ភាសាខ្មែរភាសាអង់គ្លេស

 

សិទ្ធិជនរងគ្រោះ

នេះជា​វាល​ពិឃាត​មួយ​ក្នុង​ចំណោម​វាល​ពិឃាត​ក្នុង​រាជធានី​ភ្នំពេញ

Home
វិធានការ​ការពារ​នៅ​ក្នុង​ដំណើរការ​នីតិវិធី​នៅ អ.វ.ត.ក

នៅពេលដែលសាក្សី ឬដើមបណ្តឹងរដ្ឋប្បវេណី ឬដើមបណ្តឹងធម្មតា ស្នើសុំ​វិធានការ​ការពារ ឬ​ជូនដំណឹង​ដល់​មន្ត្រី​តុលាការ អំពីការ​ព្រួយបារម្ភ​របស់គាត់​ពាក់ព័ន្ធ​នឹង​បញ្ហា​សន្តិសុខ​និង​សុវត្ថិភាព ពួកគាត់​ត្រូវបាន​ណែនាំ​ឲ្យ​ជួប​ជាមួយ​មន្ត្រី​នៅ​អង្គភាព​គាំពារ​សាក្សី​និង​អ្នកជំនាញ។

មានវិធីច្រើនយ៉ាងដែល​បុគ្គល​ម្នាក់​អាច​ផ្តល់​ដំណឹង​ដល់​មន្ត្រី អ.វ.ត.ក អំពី​ការ​ព្រួយបារម្ភ​របស់​គាត់។ ដើម​បណ្តឹង​រដ្ឋប្បវេណី ឬ​ដើមបណ្តឹង​ធម្មតា ប្រហែលជា​បាន​កត់សម្គាល់​នៅលើ​ទម្រង់​ពាក្យ​សុំ​ដាក់​ពាក្យ​បណ្តឹង​របស់​គាត់ ឬគាត់​បាន​ទទួល​ព័ត៌មាន​ពី​បុគ្គលិក​នៃ​អង្គភាព​គាំពារ​ជនរងគ្រោះ ឬពី​មេធាវី​តំណាង​ដើមបណ្តឹង​រដ្ឋប្បវេណី។ សាក្សី ឬ​ដើមបណ្តឹង​រដ្ឋប្បវេណី ឬ​ដើមបណ្តឹង​ធម្មតា អាចនឹង​ត្រូវ​សម្ភាសន៍​ដោយ​មន្ត្រីណាម្នាក់​មកពី​ការិយាល័យ​សហ​ចៅក្រម​ស៊ើបអង្កេត ហើយ​គាត់​អាច​ជម្រាប​មន្ត្រី​ដែល​មក​សម្ភាស​នោះ ឬ​ជម្រាប​ចៅក្រម​ដោយ​ផ្ទាល់។ ទោះជា​យ៉ាងណា​ក៏ដោយ បុគ្គល​ណា​ដែល​សម្តែង​ការ​ព្រួយបារម្ភ​អំពី​សន្តិសុខ​សុវត្ថិភាព គាត់​តែងតែ​ត្រូវបានណែនាំ​ជូន​ទៅ​​អង្គភាព​គាំពារ​សាក្សី​និង​អ្នកជំនាញ។

បន្ទាប់ពីបាន​ទទួល​ព័ត៌មាន​ថា សាក្សី​ឬដើម​បណ្តឹង​រដ្ឋប្បវេណី​ណាម្នាក់​ព្រួយបារម្ភ​អំពី​សន្តិសុខ​សុវត្ថិភាព​ផ្ទាល់ខ្លួន​គាត់ ឬអំពី​ការសម្ងាត់​ណាមួយ មន្ត្រីនៃ​អង្គភាព​នេះ​នឹង​ជួប​ជាមួយ​សាក្សី​ឬដើម​បណ្តឹង​រដ្ឋប្បវេណី​រូបនោះ ដើម្បី​ពិភាក្សា​អំពី​កង្វល់​នេះ។ ការគាំពារ​សាក្សី​អាច​ជា​បញ្ហា​ដែល​ស្មុគ្រស្មាញ និង​មានការ​លំបាក​ក្នុងការ​សង្ខេប​ឲ្យខ្លី ក៏ប៉ុន្តែ មាន​យុទ្ធសាស្រ្ត​ជាច្រើន​ដែលអាច​ប្រើប្រាស់​ដើម្បី​ការពារ​សន្តិសុខ​របស់​សាក្សី។

សាក្សីអាចអនុវត្ត​វិធានការ​មួយចំនួន​ដើម្បី​ការពារ​សន្តិសុខ​ដោយ​ខ្លួនឯង តាមរយៈ​យោបល់​ពី​អង្គភាព​គាំពារ​សាក្សី​និង​អ្នកជំនាញ ឬ​វិធានការ​ការពារ​ដែល​ផ្តល់​ជូន​ដោយ​អាជ្ញាធរ​ប៉ូលីស​ក្នុង​តំបន់ ឬ​តាម​សេចក្តី​សម្រេច​របស់​សហចៅក្រម​ស៊ើបអង្កេត​ឬ​អង្គជំនុំជម្រះ​សាលា​ដំបូង​ក្នុង​អំឡុង​ដំណើរការ​នីតិវិធី ឧទាហរណ៍ ចៅក្រម​​អាច​សម្រេច​ថា ឈ្មោះ​និង​អត្តសញ្ញាណ​របស់​សាក្សី​នឹង​ត្រូវរក្សា​ជា​សម្ងាត់។ ដោយសារ​ភាព​ខុសគ្នា​ពី​បុគ្គលម្នាក់​ទៅ​បុគ្គល​ម្នាក់ទៀត និងដោយសារ​​ស្ថានភាព​ពិសេស​ណាមួយ វាជា​រឿង​​ធម្មតា​​ដែល​សាក្សី​ស្នើសុំ​វិធានការ​ការពារ​រូបគាត់ ដោយសារតែ​គាត់​ធ្លាប់​ជួបប្រទះ​ការ​គំរាមកំហែង​ឬ​ការ​ប្រមាថ​មើលងាយ។

ជារឿយៗ សាធារណជននិយាយថា គាត់​ធ្លាប់​បាន​ឃើញ​ការ​អនុវត្ត​វិធានការ​ការពារ​សាក្សី​តែ​នៅក្នុង​ខ្សែវីដេអូ ដែល​ក្នុងនោះ​សាក្សី​ត្រូវបាន​ផ្លាស់ទីលំនៅ​និង​ប្តូរឈ្មោះ​ប្តូរ​អត្តសញ្ញាណ។ តាមពិតទៅ វិធានការ​បែបនេះ​​គឺជា​ទម្រង់​ដែល​កម្រ​បំផុត​នៅក្នុង​វិធានការ​ការពារ​សាក្សី ហើយ​វិធានការនេះ​ត្រូវបាន​ប្រើប្រាស់​តែក្នុង​ករណី​ដែល​ធ្ងន់ធ្ងរ​បំផុត​នៅក្នុង​ដំណើរការ​ជំនុំជម្រះ​ថ្នាក់ជាតិ​ឬ​ថ្នាក់​អន្តរជាតិ។

ពាក់ព័ន្ធនឹងវិធានការ​ការពារ​ដែល​សហចៅក្រម​ស៊ើបអង្កេត​ឬ​អង្គជំនុំជម្រះ​សាលាដំបូង​​​សម្រេច​សម្រាប់​សាក្សី ត្រូវតែ​យល់​ឲ្យ​ច្បាស់ថា បើទោះ​ជា​សាក្សី​មាន​សិទ្ធិ​ស្នើសុំ​ចៅក្រម​ឲ្យចេញបញ្ជា​ផ្តល់​វិធានការ​ការពារ​ដល់ខ្លួន​ក៏ដោយ ពុំមែន​គ្រប់​សំណូមពរ​ទាំងអស់​សុទ្ធតែ​ត្រូវបាន​ទទួល​យល់ព្រម​នោះទេ។ នៅពេល​ដែល​សាក្សី​ណាម្នាក់​ស្នើសុំ​វិធានការ​ការពារ ចៅក្រម​នឹង​សម្រេច​ថាតើ​ត្រូវអនុញ្ញាត​ឬពុំ​អនុញ្ញាត​ និង​ថា​តើ​ត្រូវ​អនុញ្ញាត​ឲ្យ​ប្រើ​វិធានការ​បែបណា។

គោលបំណង​របស់​ចៅក្រម​គឺដើម្បី​ធានា​កិច្ចគាំពារ​សាក្សី ក៏ប៉ុន្តែ​មុននឹង​សម្រេច​យល់ព្រម​អនុញ្ញាត​ឲ្យមាន​វិធានការ​ការពារ​សាក្សី​ណាម្នាក់ ចៅក្រម​ត្រូវតែ​ពិចារណា​អំពី​តម្រូវការ​របស់​សាក្សី​រូបនេះ​និង​តម្រូវការ​របស់​ជនជាប់ចោទ ជាមួយគ្នា​នេះដែរ ​តម្រូវការ​​នៃការ​ជំនុំជម្រះ​ក្តី​ដោយ​យុត្តិធម៌​និង​ស្មើភាព។ ចៅក្រម​តែងតែ​ប្រឹក្សា​យោបល់​ជាមួយ​អង្គភាព​គាំពារ​សាក្សី​និង​អ្នកជំនាញ មុននឹង​សម្រេចចិត្ត​ទៅលើ​សំណើសុំ​វិធានការ​ការពារ​សាក្សី​ណាមួយ។

វិធានការ​ការពារ​សាក្សី​នៅ អ.វ.ត.ក ពុំមែន​មាន​ន័យថា​ការពារ​តែសុវត្ថិភាព​ផ្លូវកាយរបស់​សាក្សី​នោះទេ។ សាក្សី​ជាច្រើន​មាន​អារម្មណ៍​ភ័យខ្លាច​និង​ច្របូកច្របល់​នៅមុន​ពេលចូល​ខ្លួន​ផ្តល់​សក្ខីកម្ម ហើយ​គាត់​ត្រូវការ​ជំនួយ ការធានា និង​ព័ត៌មាន​អំពី​អ្វីដែល​នឹង​កើតឡើង។ អង្គភាព​គាំពារ​សាក្សី​និង​អ្នកជំនាញ​ក៏ផ្តល់​វិធានការ​ការពារ​សាក្សី​ពីភាព​តានតឹង​ផ្លូវចិត្ត​និង​អារម្មណ៍ ដែលជា​លទ្ធផល​នៃការ​ផ្តល់​សក្ខីកម្ម​ដែរ។ ដូច្នេះហើយ បានជា​អង្គភាព​គាំពារ​សាក្សី​និង​អ្នកជំនាញ​បង្កើត​វិធានការ​ច្រើនយ៉ាង​ក្នុងការ​ការពារ​សាក្សី ដែល​ក្នុងនោះ​រួមមាន​ទាំង​សេវា​ពិគ្រោះ​ផ្លូវចិត្ត​ដល់​សាក្សីម្នាក់ៗ​ ដែល​ផ្តល់ជូន​ដោយ​បុគ្គលិក​ជំនាញ​នៃ​អង្គការ​ចិត្តសង្គម-អន្តរវប្បធម៌ (ធីភីអូ)។

លោកស្រី វេនឌី ឡបវីន គឺជាអ្នក​សម្របសម្រួល​នៃ​អង្គភាព​គាំពារ​សាក្សី​និង​អ្នកជំនាញ​នៃ អ.វ.ត.ក។

វិធានការការពារសាក្សីនៅ អ.វ.ត.ក មានចែងនៅក្នុង វិធានទី២៩ នៃវិធានផ្ទៃក្នុងនៃ អ.វ.ត.ក និងនៅក្នុងសេចក្តីណែនាំអនុវត្តវិធានការការពារ។

 
សេចក្តីប្រកាស​ព័ត៌មាន​របស់​សហព្រះរាជអាជ្ញា

សហព្រះរាជអាជ្ញា​នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា ("អ.វ.ត.ក") បាន​បញ្ចប់ការ​ស៊ើបអង្កេត​របស់ខ្លួន និង​បាន​ធ្វើ​របាយការណ៍​ស្តីពី​ការស្រាវជ្រាវ​របស់ខ្លួន ដើម្បី​ស្វែងរក​អំពី​មូលហេតុ​នៃ​មរណភាព​របស់ លោក អៀង សារី។ សហព្រះរាជអាជ្ញា​បាន​ធ្វើ​សេចក្តី​សន្និដ្ឋាន​ថា មរណភាព​របស់​លោក អៀង សារី កាលពី​ថ្ងៃ​ទី១៤ ខែមីនា ឆ្នាំ២០១៣ នៅក្នុង​មន្ទីរពេទ្យ​មិត្តភាព​ខ្មែរ-សូវៀត គឺ​ដោយសារ​មូលហេតុ​ធម្មជាតិ។ របាយការណ៍​ពេញលេញ​ស្តីពី​មរណភាពនេះ​ត្រូវបាន​បញ្ជូនទៅ​លោក​ប្រធាន​ការិយាល័យ​រដ្ឋបាល​ស្តីទី និង​លោក​អនុប្រធាន​ការិយាល័យ​រដ្ឋបាលរួចហើយ​នៅថ្ងៃនេះ។

តាមវិធាន ៣២ស្ទួន នៃ​វិធានផ្ទៃក្នុង​សម្រាប់ អ.វ.ត.ក សហព្រះរាជអាជ្ញា​ត្រូវ​ទទួល​ខុសត្រូវ​ក្នុងការ​ស្វែងរកមូលហេតុ​នៃ​មរណភាព​របស់​ជនសង្ស័យ ជនត្រូវចោទ ឬ​ជនជាប់ចោទ ដែល​បាន​ស្លាប់​ក្នុង​ពេល​ឃាត់​និង​ឃុំខ្លួន​នៅ អ.វ.ត.ក។ លោក អៀង សារី បាន​ជាប់ឃុំ​នៅ អ.វ.ត.ក ចាប់​តាំងពី​ថ្ងៃទី​១២ ខែវិច្ឆិកា ឆ្នាំ២០០៧ ដែល​ជា​កាលបរិច្ឆេទ​នៃ​ការ​ចាប់ខ្លួន​របស់​គាត់។ គាត់​ត្រូវបាន​បញ្ជូន​ទៅ​ជំនុំជម្រះ​ពីបទ​ប្រល័យ​ពូជសាសន៍​ឧក្រិដ្ឋកម្ម​ប្រឆាំង​មនុស្សជាតិ និង​អំពើ​បំពារបំពាន​យ៉ាង​ធ្ងន់ធ្ងរ​ទៅលើ​អនុសញ្ញា​ទីក្រុង​ហ្សឺណែវ​ឆ្នាំ១៩៤៩ កាលពី​ថ្ងៃទី១៥ ខែកញ្ញា ឆ្នាំ២០១០ ដោយ​សហចៅក្រម​ស៊ើបអង្កេត ហើយ​ត្រូវបាន​ធ្វើការ​ជំនុំជម្រះ​ក្ដី។ កិច្ច​ដំណើរការ​នីតិវិធី​សវនាការ​លើ​អង្គសេចក្ដី​បាន​ចាប់ផ្ដើម​កាលពី​ថ្ងៃទី២១ ខែវិច្ឆិកា ឆ្នាំ២០១១។ កិច្ច​ដំណើរការ​នីតិវិធី​នៃ​ការ​ជំនុំជម្រះក្តី​នេះ​កំពុងតែ​បន្ត​ដំណើរការ ​នៅក្នុង​ពេល​ដែល​គាត់​បាន​ចូល​សម្រាក​ក្នុង​មន្ទីរពេទ្យ និង​បន្ទាប់​មកទៀត​ក៏​ទទួល​មរណភាព​កាលពី​ថ្ងៃទី​១៤ ខែមីនា ឆ្នាំ២០១៣ នៅ​មន្ទីរពេទ្យ​មិត្តភាព​ខ្មែរ-សូវៀត នៅ​ទីក្រុង​ភ្នំពេញ។

សេចក្ដី​សន្និដ្ឋាន​ចុងក្រោយ ស្តីពី​មូលហេតុ​មរណភាព​របស់​លោក អៀង សារី គឺបាន​បញ្ជាក់​ថា គាត់ស្លាប់​ដោយសារ​មូលហេតុ​ធម្មជាតិ នាម៉ោង ៨:៤៥នាទីព្រឹក នៅថ្ងៃទី១៤ ខែមីនា ឆ្នាំ២០១៣ ដែល​បណ្តាល​មកពី​ជំងឺ​ស្ទះ​សរសៃ​​ឈាមបេះដូង ដែល​មិនអាច​ធ្វើឲ្យ​ប្រសើរ​ឡើងវិញ​បាន និង​បណ្ដាល​មកពី​ការ​ស្ពៀត​សរសៃឈាម​ចិញ្ចឹម​បេះដូង​ដែលមាន​ជា​យូរ​មកហើយ តាំងពី​មុនការ​ចាប់ខ្លួន​និង​ការ​ជាប់​ឃុំឃាំង​នៅ អ.វ.ត.ក មកម៉្លេះ។ ការ​រកឃើញ​នេះ​ត្រូវបាន​បញ្ជាក់​អះអាង​ដោយ៖ (១)របាយការណ៍​វេជ្ជសាស្រ្ត​ចុងក្រោយ និង​លិខិត​បញ្ជាក់​មរណភាព​ដែល​បាន​ចេញ​ដោយ​ក្រុមគ្រូពេទ្យ​ព្យាបាល លោក អៀង សារី។ (២)បណ្តា​ឯកសារ​នានា​ដែលជា​ប្រវត្តិ​វេជ្ជសាស្ត្រ​ជា​យូរ​មកហើយ។ (៣)ចម្លើយ​របស់​ក្រុម​គ្រូពេទ្យ​និង​បុគ្គលិកពេទ្យ​ដទៃទៀត​ដែល​មាន​វត្តមាន​នៅពេល​មរណភាព​របស់​គាត់។ និង (៤)ចម្លើយ​របស់​កូនស្រី​លោក អៀង សារី ដែលជា​គ្រូពេទ្យ និង​ដែល​មាន​វត្តមាន​នៅ​មន្ទីរពេទ្យ​តាំងពីថ្ងៃ​ទី៦ រហូតដល់​ថ្ងៃទី១៤ ខែមីនា ឆ្នាំ២០១៣ ព្រមទាំង​នៅ​ជាប់​ក្បែរ​លោក អៀង សារី តាំងពីម៉ោង ២:០០យប់ ថ្ងៃទី១៤ ខែមីនា ឆ្នាំ២០១៣ រហូតដល់​គាត់​ទទួល​មរណភាព​នៅពេល​ក្រោយមក​នាព្រឹក​ថ្ងៃនោះ។ មិនមាន​កាលៈទេសៈ​ដ៏គួរឲ្យ​សង្ស័យ​ណាមួយ ដែល​ទាក់ទង​នឹង​មរណភាព​របស់​លោក អៀង សារី ត្រូវបាន​រកឃើញ​នៅពេល​ធ្វើការ​ស៊ើបអង្កេត​នោះទេ។

ដោយសារ​មាន​ភ័ស្តុតាង​ច្បាស់លាស់ និង​ភាព​ស៊ីសង្វាក់គ្នា​ចំពោះ​មូលហេតុ​នៃ​មរណភាពនេះ ការវះកាត់​សាកសព​លោក អៀង សារី ដើម្បី​ធ្វើការ​ពិនិត្យ គឺពុំ​ចាំបាច់​ឡើយ ហើយការ​ធ្វើពិសោធន៍​ដើម្បី​រកជាតិពុល​ក្នុង​ឈាម​របស់គាត់​ដោយ​សហព្រះរាជអាជ្ញា​ ក៏ពុំ​ចាំបាច់ដែរ។ ក្រុមគ្រួសារ​របស់ អៀង សារី និង​អតីត​ក្រុមមេធាវី​ការពារក្តី​របស់​គាត់ បាន​បង្ហាញ​សំណើ​របស់​ខ្លួនថា ពួកគាត់​មិនមាន​បំណង​អនុវត្ត​ការវះកាត់​សាកសព​ដើម្បី​ពិនិត្យ ឬ​ត្រូវការ​របាយការណ៍​ជាតិពុល​ឡើយ។ អាស្រ័យ​ហេតុនេះ នៅម៉ោង ១:៣២នាទី រសៀល នាថ្ងៃ​មរណភាព​របស់​លោក អៀង សារី សាកសព​របស់គាត់​ត្រូវបាន​ប្រគល់ជូន​ឲ្យ​ទៅ​ក្រុមគ្រួសារ​របស់គាត់។

សហព្រះរាជអាជ្ញា​យល់​ឃើញ​ថា មិនមែន​ជាការ​ត្រឹមត្រូវ​នោះទេ​ ដែលដាក់​បញ្ចូល​ប្រវត្តិ​នៃ​របាយការណ៍​សុខភាព​របស់​លោក អៀង សារី ទាំងស្រុង​ជា​ឯកសារ​សាធារណៈ​នោះ ដូច្នេះហើយ អនុលោម​តាម​វិធាន ៣២ ស្ទួន នៃ​វិធាន​ផ្ទៃក្នុង របាយការណ៍​ទាំងស្រុង​ត្រូវបាន​ចាត់ថ្នាក់​ជា​ឯកសារ​សំងាត់​បំផុត ហើយ​មិនអាច​បង្ហាញជា​សាធារណៈ​បាន​ឡើយ៕

 
<< ចាប់ផ្ដើម < មុន 1 2 3 4 5 6 7 8 9 10 បន្ទាប់ > ចុងក្រោយ >>

ទំព័រ​ទី 7 ​ទាំងអស់ 26 ទំព័រ

ទំព័រដែលប្រជាប្រិយ

Contact now

Download
Victims Support Section of the ECCC