តំណាងផ្នែកច្បាប់

Home

តំណាងផ្នែកច្បាប់

ការតំណាងផ្នែកច្បាប់

តំណាងផែ្នកច្បាប់ គឺជាផ្នែកដ៏ចម្បងមួយដែលអាចធ្វើឲ្យជនរងគ្រោះមានការយល់ដឹង និង មាន លទ្ធភាពចូលរួមប្រកបដោយប្រសិទ្ធភាពក្នុងដំណើរការនីតិវិធី នៅចំពោះមុខ អ.វ.ត.ក ជាពិសេសនៅពេលដែលជនរងគ្រោះមានឆន្ទៈចូលរួមជាដើម បណ្តឹងរដ្ឋប្បវេណីដើម្បី ទាមទារសំណង។ ជនរងគ្រោះអាចមានតំណាងជាមេធាវីជាតិតែមួយរូប ឬអាចមាន តំណាងជាមេធាវីជាតិមួយរូប និងមេធាវីបរទេសមួយរូបនៅចំពោះមុខ អ.វ.ត.ក។ វិធាន១២ស្ទួន(១)(គ) នៃវិធានផ្ទៃក្នុងរបស់ អ.វ.ត.ក បញ្ជាក់ថា អង្គភាពគាំពារជនរងគ្រោះត្រូវរក្សាបញ្ជីឈ្មោះ មេធាវីជាតិ និង អន្តរជាតិដែលមានឆន្ទៈធ្វើជាតំណាងឲ្យ ជនរងគ្រោះ ឬសមាគមជនរងគ្រោះនៅចំពោះមុខ អ.វ.ត.ក។ មេធាវីដែលមាន ឆន្ទៈធ្វើជាតំណាងឲ្យជនរងគ្រោះត្រូវមានឈ្មោះនៅក្នុងបញ្ជីឈ្មោះមេធាវីរបស់ អង្គភាពគាំពារជនរងគ្រោះដែលអាចឲ្យជនរងគ្រោះមានលទ្ធភាព ជ្រើសរើស មេធាវីចេញពីក្នុងបញ្ជីនេះប្រកបដោយភាពច្បាស់លាស់។

ជនរងគ្រោះក៏អាចសុំជំនួយពីមេធាវីដែលគ្មានឈ្មោះក្នុងបញ្ជីឈ្មោះមេធាវីរបស់អង្គភាពគាំពារជនរងគ្រោះបានដែរ។ នៅក្នុងករណីនេះ មេធាវីនោះត្រូវធ្វើការទំនាក់ទំនងជាមួយអង្គភាពគាំពារជនរងគ្រោះដើម្បី បញ្ចូលឈ្មោះគាត់ទៅក្នុង បញ្ជីមេធាវីមុនពេលគាត់អាចធ្វើជាតំណាងឲ្យជនរងគ្រោះនៅចំពោះមុខ អ.វ.ត.ក។(សូមមើលផ្នែកខាងក្រោមស្តីពី លក្ខណៈវិនិច្ឆ័យដើម្បីចុះឈ្មោះក្នុងបញ្ជីមេធាវី)កិច្ចខិតខំប្រឹងប្រែងនានាត្រូវបានអនុវត្តដើម្បីធានាថា ដើមបណ្តឹង រដ្ឋប្បវេណីទាំងអស់អាចទទួលបានមេធាវីតំណាង ទោះបីជាពួកគាត់មិនមានលទ្ធភាពចំណាយលើមេធាវីក៏ដោយ។ បច្ចុប្បន្ននេះ ភាគច្រើននៃមេធាវីដែលតំណាងឲ្យដើមបណ្តឹងរដ្ឋប្បវេណីទាំងអស់ ធ្វើការមិនយកប្រាក់កម្រៃ ឬទទួល បានប្រាក់ឧបត្ថម្ភពីស្ថាប័នខាងក្រៅអ.វ.ត.ក។ លើសពីនេះទៅទៀត សព្វថ្ងៃនេះ អង្គភាពគាំពារជនរងគ្រោះកំពុង តែធ្វើការរៀបចំឲ្យមានក្រុមមេធាវីមួយក្រុម មានមេធាវីពីររូប ដើម្បីតំណាងឲ្យដើមបណ្តឹងរដ្ឋប្បវេណីនៅចំពោះមុខ អ.វ.ត.ក។ ក្រុមនេះនឹងធ្វើការសហការក៏ដូចជាជួយបំពេញបន្ថែមលើការងាររបស់ក្រុមមេធាវីផ្សេងៗទៀត។

លក្ខណៈវិនិច្ឆ័យក្នុងការបញ្ចូលឈ្មោះទៅក្នុងបញ្ជីមេធាវី

មេធាវីជាតិដែលមានបំណងចង់តំណាងឲ្យដើមបណ្តឹងរដ្ឋប្បវេណីត្រូវមានលក្ខណៈវិនិច្ឆ័យដូចខាងក្រោម ដើម្បីមាន ឈ្មោះក្នុងបញ្ជីមេធាវីរបស់អង្គភាពគាំពារជនរងគ្រោះ៖

ត្រូវជាសមាជិកគណៈមេធាវីនៃព្រះរាជាណាចក្រកម្ពុជា(BAKC)
ត្រូវមានសមត្ថភាពផ្នែកច្បាប់ព្រហ្មទណ្ឌ និងនីតិវិធីនៅថ្នាក់ជាតិ និងអន្តរជាតិ

មេធាវីអន្តរជាតិដែលមានបំណងចង់តំណាងឲ្យដើមបណ្តឹងរដ្ឋប្បវេណីត្រូវមានលក្ខណៈវិនិច្ឆ័យដូចខាងក្រោមដើម្បីមានឈ្មោះក្នុងបញ្ជីមេធាវីរបស់អង្គភាពគាំពារជនរងគ្រោះ៖

ត្រូវជាសមាជិកដែលមានកេរ្តិ៍ឈ្មោះល្អនៃសមាគមមេធាវីដែលមានការទទួលស្គាល់នៅក្នុងរដ្ឋជាសមាជិកនៃអង្គការសហប្រជាជាតិ
មានវិញ្ញាបនបត្រផ្នែកច្បាប់ ឬគុណសម្បត្តិវិជ្ជាជីវៈច្បាប់ប្រហាក់ប្រហែល
មានភាពស្ទាត់ជំនាញផ្នែកភាសាខ្មែរ បារាំង ឬអង់គ្លេស
ត្រូវមានសមត្ថភាពផ្នែកច្បាប់ព្រហ្មទណ្ឌ និងនីតិវិធីនៅថ្នាក់ជាតិ និងអន្តរជាតិ
ត្រូវមានបទពិសោធន៍បំពេញការងារផ្នែកដំណើរការនីតិវិធីព្រហ្មទណ្ឌ ក្នុងនាមជា មេធាវី ចៅក្រម ឬព្រះរាជអាជ្ញា ឬក្នុងសមត្ថភាពផ្សេងទៀត
មិនធ្លាប់ត្រូវបានចោទប្រកាន់ក្នុងរឿងក្តីព្រហ្មទណ្ឌ ឬត្រូវផ្តន្ទាទោសពិន័យធ្ងន់ធ្ងរ ដែលត្រូវបានពិចារណាថា អវិសមិតភាពក្នុងការតំណាងជនរងគ្រោះនៅចំពោះមុខអ.វ.ត.ក។
បន្ថែមលើនេះទៀត សហមេធាវីអន្តរជាតិត្រូវចុះឈ្មោះនៅគណៈមេធាវីនៃព្រះរាជាណាចក្រកម្ពុជា។

ការគាំទ្ររបស់អង្គភាពគាំពារជនរងគ្រោះចំពោះមេធាវីតំណាងដើមបណ្តឹងរដ្ឋប្បវេណី

អង្គភាពគាំពារជនរងគ្រោះនឹងផ្តល់នូវការគាំទ្រដល់ដើមបណ្តឹងរដ្ឋប្បវេណី និង មេធាវីរបស់ពួកគេក្នុង ផ្នែកមួយចំនួនដូចជា ការស្រាវជ្រាវផ្នែកច្បាប់ ការផ្តល់យោបល់លើបញ្ហាទូទៅ និង ការគាំទ្រទាក់ទង នឹងនីតិវិធីតុលាការ ក៏ដូចជាការផ្តល់លទ្ធភាពទៅលើការពិនិត្យមើលសំណុំរឿង។ ដើម្បីធ្វើការលើក កំពស់សមត្ថភាពរបស់មេធាវីតំណាងដើមបណ្តឹងរដ្ឋប្បវេណីនៅចំពោះមុខ អ.វ.ត.ក អង្គភាពគាំពារជនរងគ្រោះក៏បានរៀបចំឲ្យមានវគ្គបណ្តុះបណ្តាលនានាសម្រាប់មេធាវី។ ស្របពេលជាមួយគ្នានេះ អង្គភាព គាំពារជនរងគ្រោះបានចាប់ផ្តើមប្រមូលឯកសារបណ្ណាល័យនានាដែលទាក់ទង ទៅនឹងសិទ្ធិជនរងគ្រោះ ដែលត្រូវបានគេដាក់នៅក្នុងបណ្ណាល័យ អ.វ.ត.ក ដើម្បីឲ្យមេធាវីតំណាងដើមបណ្តឹងរដ្ឋប្បវេណីអាចរក ឯកសារទាំងនោះបាន។ តុលាការក៏នឹងរៀបចំឲ្យក្រុមមេធាវីអាចប្រើប្រាស់រាល់សម្ភារៈ និង មធ្យោបាយ នានានៅអ.វ.ត.កដែលនៅទីនោះ មេធាវីអាចជួបជាមួយកូនក្តីរបស់ខ្លួនជាលក្ខណៈឯកជន និងអាចធ្វើការ ស្រាវជ្រាវច្បាប់នានាបាន។ មេធាវីក៏នឹងទទួលបានការបណ្តុះបណ្តាលពីរបៀបប្រើប្រាស់កម្មវិធីកុំព្យូទ័រ ដែលត្រូវប្រើនៅតុលាការផងដែរ ដូច្នេះមេធាវីអាចរៀបចំសំំណុំរឿងផ្សេងៗព្រមទាំងអាចទំនាក់ទំនង យ៉ាងមានប្រសិទ្ធភាពជាមួយការិយាល័យនានានៅតុលាការ។

ដំណើរការនៃការដាក់ពាក្យសុំ

បេក្ខជនដែលមានចំណាប់អារម្មណ៍ចង់ធ្វើជាមេធាវីតំណាងដើមបណ្តឹងរដ្ឋប្បវេណីត្រូវបំពេញនូវទម្រង់បែបបទដូចខាងក្រោម។ ចំពោះមេធាវីអន្តរជាតិគឺតម្រូវឲ្យបំពេញនូវពាក្យសុំចុះឈ្មោះនៅ គណៈមេធាវីនៃព្រះរាជាណាចក្រកម្ពុជា (BAKC)បន្ថែមទៀត។ ពាក្យសុំដែលបានបំពេញរួចរាល់ហើយត្រូវភ្ជាប់មកជាមួយនូវ ឯកសារបញ្ជាក់នានាផ្ញើតាមប្រៃសណីយ៍តាមរយៈអាសយដ្ឋាន ដែលមាននៅលើពាក្យសុំស្រាប់។ អង្គភាពគាំពារជនរងគ្រោះនឹងធ្វើការពិចារណាទៅលើរាល់ពាក្យ សុំទាំងអស់ក្នុងកំឡុងពេលមួយខែបន្ទាប់ពីបានទទួលពាក្យសុំ។

ឯកសារនានា