ភាសាខ្មែរភាសាអង់គ្លេស
Home ទំព័រដើម ព័ត៌មានថ្មីៗ
ព័ត៌មានថ្មីៗ


អង្គជំនុំជម្រះ​តុលាការ​កំពូល​សម្រេច​បដិសេធ​សេចក្តីសម្រេច​ របស់អង្គជំនុំជម្រះ​សាលាដំបូង​ដែលបង្គាប់​ឲ្យដោះលែង​ អៀង ធីរិទ្ធ ​ពីមន្ទីរឃុំឃាំង​

ថ្ងៃនេះ ​អង្គជំនុំជម្រះ​តុលាការកំពូល​នៃអង្គជំនុំជម្រះ​វិសាមញ្ញក្នុង​តុលាការកម្ពុជា ​(អ.វ.ត.ក)​ បានទទួលយកបណ្តឹង​សាទុក្ខភ្លាមៗ​របស់សហព្រះរាជអាជ្ញា​ដោយមតិ​ភាគ​ច្រើនលើស​លុប ​ដោយសម្រេច​បដិសេធ​សេចក្តីសម្រេច​របស់អង្គជំនុំ​ជម្រះសាលាដំបូង​ដែលចេញ​នៅថ្ងៃទី ​១៧ ខែ វិច្ឆិកា ឆ្នាំ២០១១​ ដែលបានបង្គាប់ឲ្យ​ដោះលែង​ជនជាប់​ចោទ អៀង ធីរិទ្ធ ដោយឥត​លក្ខខណ្ឌ​នោះ។

អង្គជំនុំជម្រះ​តុលាការកំពូល​បានយល់ឃើញថា ​អង្គជំនុំជម្រះសាលា​ដំបូងត្រូវតែប្រើប្រាស់​ឲ្យអស់ពីលទ្ធភាព​នូវវិធានការនានា​ដែលមាន ដើម្បីអាច​ជួយធ្វើឲ្យ​ជនជាប់​ចោទមាន​សម្បទាចូលរួម​ក្នុងសវនាការ​បាន។ ​សេចក្តីសម្រេចនេះ ​ត្រូវបានធ្វើឡើង​ដោយផ្អែកទៅ​លើលទ្ធភាព ​ទោះបីជាមាន​តិចតួចក៏ដោយ​ ក៏ជាការធ្វើឲ្យ​ប្រសើរ​ឡើង​វិញដ៏​សមស្របមួយ ​ចំពោះសុខភាព​ផ្នែកស្មារតីរបស់ជនជាប់ចោទ​ដែលត្រូវបានប្រមើល​មើលឃើញដោយអ្នក​ជំនាញវេជ្ជសាស្រ្ត​ ដែលត្រូវ​បានចាត់តាំង​ដោយអង្គ​ជំនុំជម្រះ​សាលាដំបូង។​ ក្នុងស្ថានភាព​ដែលការផ្អាក​កិច្ចដំណើរការ​នីតិវិធី​ អាចត្រូវបាន​ផុតរលត់នោះ ​អង្គជំនុំជម្រះ​តុលាការកំពូល​យល់ឃើញថា​ ការដោះ​លែង​ជនជាប់ចោទ​ដោយ​ឥតលក្ខខណ្ឌ ​មិនតម្រូវឲ្យមានឡើយ។​ អង្គជំនុំជម្រះ​តុលាការកំពូលយល់ឃើញ​ថា ​មូលដ្ឋានដែលមាន​ពីមុនមកក្នុង​ការរក្សាទុកជន​ជាប់ចោទ​ក្នុងឃុំបណ្តោះអាសន្ន​ ត្រូវមានសុពលភាពដដែល​ ពោលគឺធានាវត្តមាន​របស់ជនជាប់ចោទ​ក្នុងអំឡុង​ពេលសវនាការ​។

អង្គជំនុំជម្រះ​តុលាការកំពូល​បង្គាប់ថា​ អង្គជំនុំជម្រះសាសាដំបូង ​ដោយមានការពិភាក្សា​ជាមួយអ្នកជំនាញ​ផ្នែកវេជ្ជសាស្ត្រ ​និងផ្នែកវិកលចរិក​សមស្រប​ ត្រូវស្នើឲ្យមាន​ការព្យាបាល​បន្ថែម​ដល់ជនជាប់​ចោទដែលអាច​ជួយឲ្យសុខភាព​ផ្នែកស្មារតី​របស់ជនជាប់ចោទ​បានប្រសើរឡើង​ ដើម្បីឲ្យជនជាប់ចោទ​អាចមានសម្បទា​ចូលរួម​សវនាការ​បាន។ ​ការព្យាបាលនេះ​ត្រូវតែធ្វើឡើងនៅ​ក្នុងមន្ទីរពេទ្យ​ ឬកន្លែងដទៃទៀត​ដែលសមស្រប​ នៅក្នុងព្រះរាជាណាចក្រកម្ពុជា។​ ជនជាប់ចោទ​ត្រូវទទួលការ​ត្រួតពិនិត្យ​ពីអ្នកជំនាញ​ផ្នែកវេជ្ជសាស្រ្ត ​ផ្នែកវិកលចរិក ​និង/ឬផ្នែកចិត្តសាស្រ្ត ​មិនឲ្យលើសពីរយៈពេល ​៦ ​(ប្រាំមួយ)ខែ ចាប់គិតពីពេលចាប់ផ្តើម​ការព្យាបាល​មក បន្ទាប់​មក ​អង្គជំនុំជម្រះ​សាលាដំបូងត្រូវ​កំណត់អំពីសម្បទា​របស់ជនជាប់​ចោទក្នុងការចូលរួមសវនាការ​ដោយមិនមានការពន្យាពេល។

អង្គជំនុំជម្រះ​តុលាការកំពូល​បានសម្រេចថា​ ការឃុំខ្លួនជន​ចាប់ចោទត្រូវ​អនុវត្តនៅក្នុង​មន្ទីរឃុំឃាំងនៃ អ.វ.ត.ក ​រហូតដល់ពេលការរៀបចំចាត់ចែង​ចាំបាច់នានា ​សម្រាប់ការ​ព្យាបាលបន្ថែមនៅ​ក្នុងមន្ទីរពេទ្យ ​ឬកន្លែងសមស្របដទៃទៀត ​ត្រូវបានបំពេញរួចរាល់​។

 
វេទិកាថ្នាក់តំបន់លើកទី១០សម្រាប់ដើមបណ្តឹងរដ្ឋប្បវេណីនៃសំណុំរឿង ០០២

អង្គភាពគាំពារជនរងគ្រោះ នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងរៀបចំវេទិកា​ថ្នាក់ តំបន់លើកទី១០ នៅខេត្តកំ​ពង់ស្ពឺ សម្រាប់​ដើមប​ណ្តឹងរដ្ឋប្បវេណី ដែលទើបទទួលស្គាល់ថ្មីៗនេះ នៃសំណុំរឿង០០២​​​ ​ ចំនួន៣០០ នាក់ មកពីរាជធានីភ្នំពេញ ខេត្តកណ្តាល ​ ខេត្តកំពង់ស្ពឺ  និងខេត្តតាកែវ។ វេទិកា​ថ្នាក់​តំបន់​លើក​នេះនឹងប្រព្រឹត្តទៅនៅ បន្ទប់ប្រជុំភោជនីយដ្ឋាន ទា ស៊ុយហេង ក្រុងច្បារមន ខេត្តកំពង់ស្ពឺ  នាថ្ងៃ​សុក្រ ទី ២៨ ខែតុលា ឆ្នាំ២០១១ វេលាម៉ោង​៧:៣០ ព្រឹក ដល់ ម៉ោង​​៣:៣០ រសៀល។ (អត្តសញ្ញាណរបស់ដើមបណ្តឹងរដ្ឋប្ប​វេណី​​នឹងត្រូវ​បាន​រក្សា​ជាសម្ងាត់​) ។

ដើមបណ្តឹងរដ្ឋប្បវេណីទាំង ៣០០នាក់ ដែលនឹងចូលរួមវេទិកាថ្នាក់តំបន់លើកនេះ ស្ថិតក្នុងចំណោម​ដើមបណ្តឹង រដ្ឋប្បវេណីនៃសំណុំរឿង ០០២​​ ដែលត្រូវបាន​អង្គបុរេជំនុំជម្រះ ទទួលស្គាល់ចំនួន ១.៧៤៥ នាក់ កាលពីថ្ងៃទី២៤ ខែ​មិថុនា ឆ្នាំ ២០១១ នេះ និងពេលក្រោយមក​ទៀត។​ រហូតមកទល់ពេល​នេះ ដើមបណ្តឹងរដ្ឋប្បវេណី​នៅក្នុងសំណុំរឿង ០០២ សរុបទាំងអស់ មានចំនួន ៣.៨៦៧ នាក់។

វេទិកាថ្នាក់តំបន់នេះគឺជាសកម្មភាពដ៏សំខាន់មួយក្នុងចំណោមសកម្មភាពនានារបស់​ អង្គភាពគាំពារជនរ​ងគ្រោះ​  ក្នុងការលើកកម្ពស់ការចូលរួមរបស់​ជនរងគ្រោះឲ្យ​កាន់តែ​ទូលំ​ទូលាយក្នុងដំណើរការរបស់ អ.វ.ត.ក ក្នុងឆ្នាំ ២០១១​ ​និងដើម្បីពង្រឹងការចូលរួមរបស់ដើមបណ្តឹងរដ្ឋប្បវេណី​ក្នុងដំណើរការច្បាប់សម្រាប់​សំណុំរឿង០០២។ វេទិកាថ្នាក់
តំបន់ នេះមានគោលបំណង​ផ្តល់ឱកាសឲ្យដើម​បណ្តឹង​រដ្ឋប្បវេណី ៖

-     ជួបជាមួយមេធាវីដើមបណ្តឹង​រដ្ឋប្បវេណី​ដើម្បីពិភាក្សាអំពីសិទ្ធិក្នុងការដាក់ពាក្យបណ្តឹង នីតិវិធីចូលរួមនៅក្នុង ដំណើរការកាត់ក្តី ក៏ដូចជាប្រមូលគំនិតដែល​ពាក់ព័ន្ធនឹង​សំណង​ដែល​ស្នើឡើងដោយដើមបណ្តឹងរដ្ឋប្បវេណី ដើម្បី រៀបចំគម្រោងសំណងនិងស្នើទៅកាន់ អ.វ.ត.ក ។

-     ជួបជាមួយមន្រ្តីមកពីការិយាល័យនានានៃ អ.វ.ត.ក​ និងតំណាងសង្គមស៊ីវិល ដើម្បីស្វែងយល់ពីការវិវឌ្ឍថ្មីៗ របស់តុលាការ។

ដើមបណ្តឹង​​រដ្ឋប្បវេណីនៃសំណុំរឿង ០០១ ដើម្បីចែករំលែកបទពិសោធសម្រាប់សំណុំរឿង០០២។​

 
ព័ត៌មាន​ស្តី​អំពី​ការ​ចូលរួម​របស់​សាធារណជន​និង​អ្នកសារព័ត៌មាន នៅក្នុង​សវនាការ​លើ​អង្គសេចកី្ត​ក្នុង​សំណុំរឿង ០០២ នៅថ្ងៃទី ២១-២៤ ខែវិច្ឆិកា ឆ្នាំ២០១១ និង​សវនាការ​ពិនិត្យ​ភ័ស្តុតាង​ដែល​នឹង​ចាប់ផ្តើម​នៅថ្ងៃ​ទី២៨ ខែវិច្ឆិកា ឆ្នាំ២០១១

អង្គជំនុំជម្រះ​សាលាដំបូង​នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា (អ.វ.ត.ក) បាន​ប្រកាស​ថា សវនាការ​លើ​អង្គសេចកី្ត​ដើម្បី​ជំនុំជម្រះ​សំណុំរឿង ០០២ ប្រឆាំងនឹង ខៀវ សំផន, នួន ជា, អៀង សារី, និង អៀង ធីរិទ្ធ នឹងចាប់ផ្តើមនៅវេលាម៉ោង ៩ ព្រឹក ថ្ងៃច័ន្ទ ទី២១ ខែវិច្ឆិកា ឆ្នាំ២០១១ ដូចមានក្នុងកម្មវិធី ខាងក្រោម៖

ថ្ងៃច័ន្ទ ទី២១ ខែវិច្ឆិកា ឆ្នាំ២០១១
- ការ​អាន​បទ​ចោទប្រកាន់​ទាំងឡាយ​ប្រឆាំង​នឹង​ជនជាប់ចោទ​នីមួយៗ។
- ការ​ថ្លែង​សេចកី្ត​សន្និដ្ឋាន​ចោទប្រកាន់​របស់​សហព្រះរាជអាជ្ញា។

ថ្ងៃអង្គារ ទី២២ ខែវិច្ឆិកា ឆ្នាំ២០១១
- ការ​ថ្លែង​សេចកី្ត​សន្និដ្ឋាន​ចោទប្រកាន់​របស់​សហព្រះរាជអាជ្ញា (បន្ត)

ថ្ងៃពុធ ទី២៣ ខែវិច្ឆិកា ឆ្នាំ២០១១
- ការ​ឆ្លើយតប​របស់​ក្រុមមេធាវី​ការពារកី្ត ទៅនឹង​ការ​ចោទប្រកាន់​របស់​សហព្រះរាជអាជ្ញា

ថ្ងៃព្រហស្បតិ៍ ទី២៤ ខែវិច្ឆិកា ឆ្នាំ២០១១
- ការ​ឆ្លើយ​តប​របស់​ក្រុម​មេធាវី​ការពារកី្ត​ទៅនឹង​សេចក្តី​សន្និដ្ឋាន​លើ​បទចោទ​ប្រកាន់​របស់​សហព្រះរាជអាជ្ញា​(បន្ត)

បន្ទាប់ពី​ការធ្វើ​សេចកី្ត​សន្និដ្ឋាន​ចោទប្រកាន់​របស់​សហព្រះរាជអាជ្ញា និង​ការ​ឆ្លើយតប​របស់​ក្រុមមេធាវី​ការពារក្តី​រួចមក សវនាការ​ដើម្បី​ពិនិត្យ​លើ​ភ័ស្តុតាង​នៅ​ក្នុង​សំណុំរឿង ០០២ នឹង​ចាប់ផ្តើម​នៅវេលា​ម៉ោង ៩ ព្រឹក ថ្ងៃច័ន្ទ ទី២៨ ខែវិច្ឆិកា ឆ្នាំ២០១១។

ព័ត៌មានសម្រាប់អ្នកចូលរួម
សាលសវនាការ​មាន​កន្លែង​អង្គុយ​ចំនួន ៤៨២ កន្លែង ដែលនឹង​ត្រូវរៀបចំ​ដូចតទៅ៖

១. ដើមបណ្តឹង​រដ្ឋប្បវេណី​នៃ​សំណុំរឿង ០០២ និង​តំណាង​ផ្លូវច្បាប់
កន្លែង​អង្គុយ​ចំនួន ២៣០ ត្រូវបាន​ត្រៀមទុក​សម្រាប់​ដើមបណ្តឹង​រដ្ឋប្បវេណី ដែល​ត្រូវបាន​សម្របសម្រួល​ដោយ​អង្គភាព​គាំពារ​ជនរងគ្រោះនិង​អង្គការ​អន្តរការី និង​តំណាង​ផ្លូវច្បាប់​របស់​គាត់។ កន្លែង​អង្គុយ​ណា​ដែល​នៅ​ទំនេរ​ត្រឹមម៉ោង ៨:៤៥ នាទី នឹង​ត្រូវ​ផ្តល់ជូន​សាធារណជន​ទូទៅ។  

២. ភ្ញៀវ​អង្គទូត មន្ត្រីរាជរដ្ឋាភិបាល និងអ្នកស្រាវជ្រាវ
កន្លែង​អង្គុយ​ចំនួន ៥០ ត្រូវបាន​ត្រៀមទុក​សម្រាប់​ភ្ញៀវ​អង្គទូត តំណាង​រាជរដ្ឋាភិបាល និង​អ្នកស្រាវជ្រាវ។ សូម​ចុះឈ្មោះ​កក់កន្លែង​ទុក​ជាមុន​តាមរយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។ ។ ការ​ចុះឈ្មោះ​កក់កន្លែង​ទុក​ជាមុន​នឹង​ផុតកំណត់​នៅ​ថ្ងៃពុធ ទី១៦ ខែវិច្ឆិកា ឆ្នាំ២០១១ វេលាម៉ោង ៤ រសៀល។ កន្លែង​អង្គុយណា​ដែល​នៅ​ទំនេរ​ត្រឹម​ម៉ោង ៨:៤៥ នាទី នឹង​ត្រូវ​ផ្តល់ជូន​សាធារណជន​ទូទៅ។  

៣. តំណាង​របស់​អង្គការ​មិនមែន​រដ្ឋាភិបាល
កន្លែង​អង្គុយ​ចំនួន ៥០ ត្រូវបាន​ត្រៀមទុក​សម្រាប់​ឲ្យ​តំណាង​របស់​អង្គការ​មិនមែន​រដ្ឋាភិបាល​ដែល​មាន​កម្មវិធី​ទាក់ទង​នឹង​ការងារ​របស់ អ.វ.ត.ក។ សូម​ចុះឈ្មោះ​កក់កន្លែង​ទុក​ជាមុន​តាម​រយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។ ។ ការចុះឈ្មោះ​កក់​កន្លែង​ទុកជាមុន​នឹង​ផុតកំណត់​នៅ​ថ្ងៃ​ពុធ ទី១៦ ខែវិច្ឆិកា ឆ្នាំ២០១១ វេលាម៉ោង ៤ រសៀល។ ក្រោយពី​ផុតកំណត់​រយៈពេល​ចុះឈ្មោះ​កក់កន្លែងទុក​ជាមុន និង​អាស្រ័យ​លើ​ចំនួន​សរុប​នៃ​អ្នកចុះឈ្មោះ​កក់កន្លែងទុក​ជាមុន អ.វ.ត.ក នឹង​ជូនដំណឹង​អំពី​ចំនួន​កន្លែង​ដែល​បម្រុងទុក​សម្រាប់​អង្គការ​មិនមែន​រដ្ឋាភិបាល​នីមួយៗ។ ប្រសិនបើ​ចំនួន​អ្នកចុះឈ្មោះ​កក់កន្លែងទុក​ជាមុន​លើសពី​ចំនួន​កន្លែង​អង្គុយ​សរុប​ដែល​ត្រៀម​បម្រុងទុក អ.វ.ត.ក នឹង​ផ្តល់​កន្លែង​អង្គុយ​ដល់​តំណាង​អង្គការ​មិនមែន​រដ្ឋាភិបាល​នីមួយៗ ផ្អែក​តាម​អាទិភាព​ដូច​ខាងក្រោម៖

ក. បុគ្គលិក​មកពី​អង្គការ​អន្តរការី  
ខ. បុគ្គលិក​ពាក់ព័ន្ធ​នឹង​កម្មវិធី​ត្រួតពិនិត្យ​តុលាការ​ជា​ទៀងទាត់
គ. អង្គការ​មិនមែន​រដ្ឋាភិបាល​ដែល​មាន​វត្តមាន​ទៀងទាត់​នៅក្នុង​សវនាការ​កាលពី​លើកមុនៗ។
ឃ. ផ្សេងៗទៀត
កន្លែង​អង្គុយ​ណា​ដែល​នៅទំនេរ​ត្រឹមម៉ោង ៨:៤៥ នាទី នឹង​ផ្តល់​ជូន​សាធារណជន​ទូទៅ។

៤. តំណាងសារព័ត៌មាន
កន្លែង​អង្គុយ​ចំនួន ២០ នៅក្នុង​សាលសវនាការ នឹង​បម្រុងទុក​សម្រាប់​តំណាង​សារព័ត៌មាន។ អាទិភាព​នឹង​ផ្តល់ជូន​អ្នកសារព័ត៌មាន​ខាងផ្នែក​បោះពុម្ព។ សូម​ចុះឈ្មោះ​កក់កន្លែងទុក​ជាមុន តាម​រយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។ ។ ការ​ចុះឈ្មោះ​កក់កន្លែង​ទុកជាមុន​នឹង​ផុតកំណត់​នៅថ្ងៃ​ពុធ ទី១៦ ខែវិច្ឆិកា ឆ្នាំ២០១១ វេលាម៉ោង ៤ រសៀល។ សមាជិក​អ្នកសារព័ត៌មាន​ដែល​នៅ​សេសសល់ នឹង​ត្រូវបាន​ផ្តល់​កន្លែង​អង្គុយ​នៅក្នុង​បន្ទប់​សារព័ត៌មាន C105 នៅ​ជាន់​ផ្ទាល់ដី​នៃ​អគារ​តុលាការ។

៥. សាធារណជនទូទៅ
កន្លែង​អង្គុយ​ចំនួន ៥០ នឹង​ត្រៀម​សម្រាប់​ផ្តល់​ជូន​សាធារណជន​ទូទៅ​តាម​គោលការណ៍​មកមុន​បានមុន។

ទ្វារ​ច្រក​ចូល​សម្រាប់​ភ្ញៀវ​នឹង​បើក​នៅ​ម៉ោង ៧ព្រឹក នៅថ្ងៃ​សវនាការ​នីមួយៗ។ អ.វ.ត.ក ណែនាំ​ឲ្យ​អ្នក​ចូលរួម​គួរតែ​មក​ដល់​ អ.វ.ត.ក ​ឲ្យ​បាន​មុន ដើម្បី​​ទុក​​ពេលវេលា​​គ្រប់គ្រាន់​​សម្រាប់​ការ​​ត្រួតពិនិត្យ​សន្តិសុខ​និង​ការ​ចែក​សំបុត្រចូល។ អ.វ.ត.ក នឹង​បិទ​ច្រកចូល​ទៅកាន់​សាលសវនាការ​នៅម៉ោង ៨:៤៥ នាទីព្រឹក ឬ​នៅពេល​ដែល​សាលសវនាការ​មាន​មនុស្ស​អង្គុយ​ពេញ។

សូមរំឭក​ថា ដើម្បី​ចូល​ក្នុង​សាលសវនាការ អ្នក​ចូលរួម​ទាំងអស់​ត្រូវតែ​បង្ហាញ​ប័ណ្ណសម្គាល់ខ្លួន (ដែល​មាន​បិទ​រូបថត) ដល់​សន្តិសុខ​នៅ​ច្រក​មាត់ទ្វារ​ខាងក្រៅ។ អ្នក​ដែល​មាន​អាយុ​ក្រោម១៦ឆ្នាំ នឹង​មិន​ត្រូវបាន​អនុញ្ញាត​ឲ្យ​ចូលរួម​ឡើយ ហើយ​អ្នក​ដែល​មាន​អាយុ​ចន្លោះ​ពី១៦ដល់១៨ឆ្នាំ អាច​ចូល​បាន​លុះត្រាតែ​មាន​មនុស្ស​ចាស់​មក​ជាមួយ។ សាធារណជន​ត្រូវតែ​រក្សា​ភាពថ្លៃថ្នូរ និង​អាកប្បកិរិយា​សមរម្យ​គ្រប់​ពេលវេលា និង​ត្រូវមាន​សម្លៀកបំពាក់​សមរម្យ។ មិន​អនុញ្ញាត​ឲ្យ​យក​ទូរស័ព្ទដៃ កាបូបធំៗ អាហារ ឬភេសជ្ជៈ ចូលក្នុង​សាលសវនាការ​ឡើយ។

អ.វ.ត.ក មាន​ទីតាំង​នៅ​សង្កាត់​ចោមចៅ ចម្ងាយ​១៦គីឡូម៉ែត្រ​ពី​រាជធានី​ភ្នំពេញ​ តាម​ផ្លូវជាតិ​លេខ​៤​ឆ្ពោះ​ទៅ​កាន់​ខេត្ត​ព្រះសីហនុ។ សូម​អញ្ជើញ​សាធារណជន​និង​អ្នកសារព័ត៌មាន​ចូល​តាម​ច្រក​សម្រាប់​ភ្ញៀវ​ដែល​ស្ថិត​នៅ​ផ្នែក​ខាងកើត​នៃ អ.វ.ត.ក។ អ.វ.ត.ក មាន​ទីធ្លា​សម្រាប់​ភ្ញៀវ​ចត​យានយន្ត។

ការចុះឈ្មោះសុំប័ណ្ណព័ត៌មានសម្រាប់អ្នកសារព័ត៌មាន
អ្នកសារព័ត៌មាន​ដែល​មាន​បំណង​ចូលរួម​តាមដាន​ដំណើរការ​សវនាការ​របស់ អ.វ.ត.ក នៅថ្ងៃទី២១-២៨ ខែវិច្ឆិកា ឆ្នាំ២០១១ ត្រូវតែ​មាន​ប័ណ្ណ​សម្រាប់​អ្នកសារព័ត៌មាន និង​ត្រូវ​ចុះឈ្មោះ​ជាមុន។ សូម​អនុវត្ត​តាម​លក្ខខណ្ឌ​ខាងក្រោម​ដើម្បី​សុំ​ប័ណ្ណព័ត៌មាន៖

ក) អ្នក​សារព័ត៌មាន​ដែល​កំពុង​កាន់​ប័ណ្ណព័ត៌មាន​មាន​សុពលភាព​ជា​ផ្លូវការ​របស់ អ.វ.ត.ក ត្រូវ​ចុះឈ្មោះ​នៅ​ផ្នែក​កិច្ចការ​សាធារណៈតាម​រយៈ​ការ​ផ្ញើ​សារអេឡិចត្រូនិក​ទៅកាន់ អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

ខ) អ្នកសារព័ត៌មាន​ដែល​មាន​ប័ណ្ណព័ត៌មាន​ជាផ្លូវការ​របស់ អ.វ.ត.ក ប៉ុន្តែ​ផុតកំណត់ ត្រូវ​បំពេញ​ទម្រង់​បែបបទ​សុំប័ណ្ណព័ត៌មាន​សាជាថ្មី ដោយ​មាន​ចុះហត្ថលេខា​ផង និង​ផ្ញើ​មក​ជាមួយ​នឹង​សំណើសុំ​ចុះ​ឈ្មោះ​តាមរយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។ ។ សូម​កុំភ្លេច​បញ្ជាក់​លេខ​ប័ណ្ណចាស់​ដែល​ផុតកំណត់។

គ) អ្នកសារព័ត៌មាន​ដែល​មិនទាន់​មាន​ប័ណ្ណព័ត៌មាន​ដែល​ចេញ​ដោយ អ.វ.ត.ក ត្រូវ​បំពេញ​ទម្រង់​បែបបទ​សុំប័ណ្ណសារព័ត៌មាន​ដោយ​មាន​ចុះហត្ថលេខា ភ្ជាប់រូបថត​ទម្រង់ jpg មួយសន្លឹក និង​ច្បាប់​ចម្លង​លិខិត​ឆ្លងដែនមួយច្បាប់ ផ្ញើមក​ជាមួយ​សំណើ​សុំ​ចុះ​ឈ្មោះ​តាម​រយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។
ទម្រង់​បែបបទ​សម្រាប់​សុំប័ណ្ណព័ត៌មាន​អាច​ទាញ​យក​បាន​ពី​គេហទំព័រ​របស់ អ.វ.ត.កៈ http://www.eccc.gov.kh/sites/default/files/ECCC_Accreditation_Media_Appl....

អ.វ.ត.ក ត្រៀមបម្រុង​កន្លែង​អង្គុយ​ចំនួន ២០កន្លែង នៅក្នុង​សាលសវនាការ​សម្រាប់​តំណាង​សារព័ត៌មាន។ អាទិភាព​នឹង​ត្រូវបាន​ផ្តល់ជូន​អ្នកសារព័ត៌មាន​ខាង​ផ្នែក​បោះពុម្ព។ អ្នកសារព័ត៌មាន​ដទៃទៀត​នឹង​ត្រូវ​រៀបចំ​ជូន​កន្លែង​អង្គុយ​ក្នុង​បន្ទប់​សារព័ត៌មាន​នៅ​ជាន់​ផ្ទាល់ដី។ អ្នកសារព័ត៌មាន​ដែល​មាន​បំណង​ទទួលបាន​កន្លែង​អង្គុយ​ក្នុង​សាលសវនាការ ត្រូវ​ធ្វើ​សំណើសុំ​កន្លែង​អង្គុយ​ព្រមគ្នា​ជាមួយ​នឹង​សំណើសុំ​ចុះឈ្មោះ​សម្រាប់​ការចូលរួម​ស្តាប់​សវនាការ។

អ្នកសារព័ត៌មាន​ត្រូវតែ​មក​ដល់​កន្លែង​អង្គុយ​របស់ខ្លួន​ឲ្យបាន ១៥នាទី មុន​ពេល​បើក​សវនាការ។ ពុំ​អនុញ្ញាត​ឲ្យ​យក​ម៉ាស៊ីនថតរូប កុំព្យូទ័រ​យួរដៃ ទូរស័ព្ទដៃ ឬឧបករណ៍​ថតសំឡេង ចូល​ក្នុង​សាលសវនាការ​ឡើយ។

ថ្ងៃផុត​កំណត់​​ចុះឈ្មោះ​សម្រាប់​អ្នកសារព័ត៌មាន៖ ថ្ងៃពុធ ទី១៦ ខែវិច្ឆិកា ឆ្នាំ២០១១

ការផ្តល់ជូនអ្នកសារព័ត៌មាន
ផ្នែកកិច្ចការ​សាធារណៈ​នៃ អ.វ.ត.ក នឹង​ផ្តល់​មធ្យោបាយ​នានា​នៅ​ជាន់​ផ្ទាល់ដី​នៃ​អគារ​សវនាការ ដើម្បី​ជួយ​សម្រួល​ដល់​អ្នកសារព័ត៌មាន​ក្នុង​អំឡុងពេល​សវនាការ។

នៅក្នុង​បន្ទប់​ការងារ​ព័ត៌មាន (C108) នៅជាន់​ផ្ទាល់ដី​នៃ​អគារ​សវនាការ មាន​ទីកន្លែង​ស្ងប់ស្ងាត់​សម្រាប់​ធ្វើការ និង​មាន​កុំព្យូទ័រ​មួយចំនួន​ដែល​ភ្ជាប់​ប្រព័ន្ធ​អ៊ីនធឺណិត​រួចជាស្រេច សម្រាប់​អ្នកសារព័ត៌មាន​ប្រើប្រាស់​តាម​គោលការណ៍​មកមុន​បានមុន។ សូមបញ្ជាក់ថា សេវាអ៊ីនធឺណិត​គ្មានខ្សែ​នៅ អ.វ.ត.ក នៅ​មាន​កម្រិត​នៅឡើយ ដូច្នេះ​អ្នកសារព័ត៌មាន​គួរតែ​យក​ម៉ូឌឹម 3G (3G modems) ផ្ទាល់ខ្លួន​មកជាមួយ ប្រសិនបើ​អ្នកសារព័ត៌មាន​ត្រូវការ​បញ្ជូន​ឬទាញ​យក​ឯកសារ​ទំហំធំៗ។

នឹង​មាន​ផ្តល់​ការ​ផ្សាយ​បន្តផ្ទាល់​ជាវីដេអូ និង​ជាសំឡេង អំពី​ដំណើរការ​សវនាការ នៅក្នុង​បន្ទប់​សម្រាប់​អ្នកសារព័ត៌មាន (C105) ដែល​ស្ថិត​នៅ​ជាន់ផ្ទាល់ដី​នៃ​សាលសវនាការ។ ការ​ផ្សាយ​បន្តផ្ទាល់​ជា​ភាសាខ្មែរ​នៅក្នុង​បន្ទប់ C109 និង​ភាសា​អង់គ្លេស​នៅក្នុង​បន្ទប់ C105។

ការថតរូបភាព
ផ្នែក​កិច្ចការ​សាធារណៈ​នៃ អ.វ.ត.ក នឹង​ផ្តល់​រូបភាព​ដែល​មាន​គុណភាព​ខ្ពស់​នៅពេល​ចាប់ផ្តើម​សវនាការ។

ការថតសំឡេង
ការ​ផ្សាយ​សំឡេង​អំពី​ដំណើរការ​សវនាការ នឹង​ត្រូវបាន​ផ្តល់ជូន​អ្នកសារព័ត៌មាន​តាមប្រព័ន្ធ PHONO/XLR។ អ្នកសារព័ត៌មាន​អាច​ថត​ការ​ផ្សាយសំឡេង​នេះបាន​នៅក្នុង​បន្ទប់​តាមដាន​ព័ត៌មាន (C105) ដោយ​ប្រើ​ឧបករណ៍​ភ្ជាប់​មួយ​ក្នុង​ចំណោម​ឧបករណ៍ភ្ជាប់​ចំនួន ៤៨ (មាន​ឧបករណ៍​ភ្ជាប់​ចំនួន ១៦ សម្រាប់​ភាសា​នីមួយៗ មានខ្មែរ អង់គ្លេស និងបារាំង)។ ការ​តភ្ជាប់​ពី​ម៉ាស៊ីន​ថតសំឡេង​មួយ​ទៅ​ម៉ាស៊ីន​ថតសំឡេង​មួយទៀត អាច​ធ្វើ​ទៅបាន​ប្រសិនបើ​អ្នកសារព័ត៌មាន​មាន​ខ្សែ​សម្រាប់​តភ្ជាប់។ ពុំអនុញ្ញាត​ឲ្យ​ថតសំឡេង​នៅក្នុង​សាលសវនាការ​ឡើយ។

ការថតវីដេអូ
ការផ្សាយ​វីដេអូ​អំពី​ដំណើរការ​សវនាការ នឹង​ត្រូវបាន​ផ្តល់ជូន​តាម​ប្រព័ន្ធ BNC (PAL signal)។ អ្នកសារព័ត៌មាន​អាច​ចម្លង​វីដេអូ​នៅក្នុង​បន្ទប់​តាមដាន​ព័ត៌មាន (C105) ដោយ​ប្រើប្រាស់​ឧបករណ៍​ភ្ជាប់​មួយ​ក្នុង​ចំណោម​ឧបករណ៍​ភ្ជាប់​ចំនួន ៣០ ដែល​មាន​នៅ​ទីនោះ។ ការ​តភ្ជាប់ពី​ម៉ាស៊ីនថតវីដេអូមួយទៅ​ម៉ាស៊ីន​វីដេអូមួយទៀត​អាច​ធ្វើទៅ​បាន​ប្រសិនបើ​អ្នកសារព័ត៌មាន​មានខ្សែ​សម្រាប់​តភ្ជាប់។ ពុំអនុញ្ញាត​ឲ្យ​ថតវីដេអូ​នៅក្នុង​សាលសវនាការ​ឡើយ។

ការដំឡើង​ឧបករណ៍​សារព័ត៌មាន និង​ការ​កក់ទុក​កន្លែងជាមុន​នៅ​បន្ទប់​សារព័ត៌មាន C105
អ្នកសារព័ត៌មាន​ដែល​មាន​បំណង​ចង់​ដំឡើង​ឧបករណ៍​ជាមុន និង​កក់កន្លែង​ជាមុន​នៅក្នុង​បន្ទប់​សារព័ត៌មាន អាចមក​ទស្សនា អ.វ.ត.ក នៅថ្ងៃសុក្រ ទី១៨ ខែវិច្ឆិកា ចន្លោះពីម៉ោង ៩ព្រឹក ដល់ម៉ោង ២រសៀល ឬ​នៅថ្ងៃ​អាទិត្យ ទី២០ ខែវិច្ឆិកា ឆ្នាំ២០១១ ចន្លោះពី​ម៉ោង ១០ព្រឹក ដល់ម៉ោង ៣រសៀល។

មធ្យោបាយ​ដឹកជញ្ជូន​ដោយ​ឥតគិតថ្លៃ​សម្រាប់​អ្នកសារព័ត៌មាន
អ.វ.ត.ក នឹង​ផ្តល់​ការ​ដឹកជញ្ជូន​ដោយ​រថយន្តក្រុង​ដោយឥត​គិតថ្លៃ​ដល់​អ្នកសារព័ត៌មាន​ដែល​ពុំមាន​យានជំនិះ​ផ្ទាល់ខ្លួន​សម្រាប់​ធ្វើដំណើរ​មកកាន់ អ.វ.ត.ក និង​ត្រឡប់​ទៅវិញ។ រថយន្តក្រុង​នឹង​ចេញដំណើរ​ពី​មជ្ឈមណ្ឌល​ព័ត៌មាន​របស់ អ.វ.ត.ក ដែល​មាន​ទីតាំង​នៅ​ផ្ទះលេខ ៦អា ផ្លូវលេខ២១ សង្កាត់​ទន្លេបាសាក់ ខ័ណ្ឌ​ចំការមន នៅវេលា ម៉ោង ៧:០០ព្រឹក ហើយ​នឹង​មកដល់​មុខ​ស្ថានីយ៍​រថភ្លើង​នៅវេលាម៉ោង​ប្រមាណ ៧:១៥នាទី នៃថ្ងៃ​សវនាការ។ អ្នកសារព័ត៌មាន​ដែល​ចង់​ជិះ​រថយន្ត​ក្រុង​ត្រូវតែ​ចុះឈ្មោះនៅ​ផ្នែក​កិច្ចការ​សាធារណៈ​ជាមុន​តាមរយៈ អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

សម្រាប់​ព័ត៌មាន​បន្ថែម សូមទាក់ទង៖

លោក ឡាស អូលសិន
មន្រ្តីទំនាក់ទំនងផ្នែកច្បាប់
ទូរស័ព្ទដៃ៖ +៨៥៥(០)១២ ៤៨៨ ០២៣
ទូរស័ព្ទ៖ +៨៥៥(០)២៣ ២១៩ ៨៤១ លេខបន្ត ៦១៦៩
សារអេឡិចត្រូនិក៖ អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

លោក នេត្រ ភក្រ្តា
មន្ត្រីនាំពាក្យសាលាក្តីខ្មែរក្រហម
ទូរស័ព្ទដៃ៖ +៨៥៥(០)១២ ៤៨៣ ២៨៣ 
សារអេឡិចត្រូនិក៖ អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

 
សេចក្តី​ប្រកាស​ព័ត៌មាន​របស់​ការិយាល័យ​សហ​ចៅក្រម​ស៊ើបអង្កេត

នាថ្ងៃនេះ មានសារព័ត៌មាន​មួយចំនួនត្រូវ​បាន​ចុះផ្សាយនៅក្នុងបណ្តាញសារ​ព័ត៌មាន​ទាក់ទិន​ទៅនឹង​សហ​ចៅក្រម​ស៊ើបអង្កេត ជាពិសេស​ទាក់ទង​ទៅ​នឹង​ការណ៍​ដែលថា "...សហចៅក្រម​ស៊ើបអង្កេត​ទាំងពីរ​បាន​ចុះ​កាលបរិច្ឆេទ​ថយក្រោយ និង​បាន​កែប្រែ​ជា​សម្ងាត់​នូវ​ឯកសារ​ដែល​ដាក់​ចូល​ក្នុង​សំណុំរឿង ០០៣..."។  ការ​ចោទ​ប្រកាន់​ទាំងនេះ​ត្រូវបានធ្វើឡើង​ដោយ​យោង​លើ​គំនិត​មតិ​ភាគតិច​របស់​ចៅក្រម​អន្តរជាតិ (នៃ​អង្គបុរេ​ជំនុំជម្រះ) ទាក់ទង​ទៅនឹង​បណ្តឹង​ឧទ្ធរណ៍​របស់​អ្នក​​ដាក់​ពាក្យ​សុំ​តាំងខ្លួន​ជាដើម​បណ្តឹង​រដ្ឋប្បវេណី​ម្នាក់។ តាមធម្មតា សហ​ចៅក្រម​ស៊ើបអង្កេត​មិនគួរ​ធ្វើការ​ឆ្លើយតប​​ណាមួយទៅនឹង​​ការ​​បញ្ចេញ​ទស្សនៈ​​ណាមួយ​របស់​​ចៅក្រម​​ណាមួយឡើយ ជាពិសេស​ចំពោះ​មតិ​ដែល​ជា​ការ​វាយតម្លៃ​ផ្ទាល់ខ្លួន និង​ដែល​មិនមែន​ជា​សំអាងហេតុ​នៃ​សេចក្តី​សម្រេច​ណាមួយនោះ។ ប៉ុន្តែ​ទោះបី​ជា​យ៉ាងនេះ​ក៏ដោយ ដើម្បី​ចៀសវាង​នូវ​ការ​ភ័ន្តច្រឡំ​របស់​សាធារណៈជន ការិយាល័យ​សហចៅក្រម​ស៊ើបអង្កេត សូម​ធ្វើការ​គូស​បញ្ជាក់​ដូច​ខាងក្រោម ៖

- បន្ទាប់ពី​​ទទួល​បាន​នូវ​ការ​ដាក់​ពាក្យ​សុំ​តាំងខ្លួន​ជា​ដើមបណ្តឹង​រដ្ឋប្បវេណី​របស់​បុគ្គល​ខាងលើ ដែល​ត្រូវបាន​ទទួលស្គាល់​ជា​ដើម​បណ្តឹង​រដ្ឋប្បវេណី​ក្នុង​សំណុំរឿង ០០១ និង ០០២ ដោយ​សហ​ចៅក្រម​ស៊ើបអង្កេត​រួចហើយ នាថ្ងៃទី២៩ ខែមេសា ឆ្នាំ២០១១ សហ​ចៅក្រម​ស៊ើបអង្កេត​បាន​ចេញ​នូវ​ដីកា​សម្រេច​បដិសេធ​ការ​ដាក់​ពាក្យ​សុំ​តាំងខ្លួន​ជា​ដើមបណ្តឹង​រដ្ឋប្បវេណី​នោះ​នៅ​ក្នុង​ក្របខ័ណ្ឌ​នៃ​សំណុំរឿង ០០៣ និង ០០៤។ ដោយហេតុថា ពាក្យសុំ​មាន​តែមួយ ប៉ុន្តែ​ស្នើ​សុំ​តាំងខ្លួន​ជា​ដើម​បណ្តឹង​រដ្ឋប្បវេណី​ទាំង​ក្នុង​សំណុំរឿង ០០៣ និង ០០៤ សហ​ចៅក្រម​ស៊ើបអង្កេត​ត្រូវ​ចេញ​ដីកា​សម្រេច​ពីរ​ផ្សេងគ្នា ដែល​ដីកា​សម្រេច​មួយ​សម្រាប់​សំណុំរឿង ០០៣ និង​ដីកា​សម្រេច​មួយទៀត​សម្រាប់​សំណុំរឿង ០០៤ ទោះបីជា​ដីកា​សម្រេច​ទាំងពីរ​មាន​សម្អាងហេតុ​ដូចគ្នា​ក៏ដោយ។

- ដោយហេតុថា នៅក្នុង​ការ​រៀបចំ​ដីកា​សម្រេច​សម្រាប់​សំណុំរឿង ០០៣ មាន​លេខ​យោង​មួយចំនួន​ដែល​មិនត្រូវបាន​កែប្រែ​អស់ និង​ត្រូវបាន​កត់សម្គាល់​ឃើញ​ដោយ​ក្រឡា​បញ្ជី សហ​ចៅក្រម​ស៊ើបអង្កេត​បាន​អនុញ្ញាត​ឲ្យ​ក្រឡាបញ្ជី​ធ្វើការ​កែតម្រូវ​តាម​នីតិវិធី​ដែល​មាន​ចែង​នៅ​ក្នុង​សេចក្តី​ណែនាំ​អនុវត្ត​ស្តីពី​ការ​ដាក់​ឯកសារ និង​ស្រប​ទៅ​តាម​ការ​អនុវត្ត​កន្លងមក។

- សំណើសុំ​កែតម្រូវ​ត្រូវបាន​ធ្វើឡើង​ដោយ​ក្រឡាបញ្ជី ដោយ​មាន​ភ្ជាប់​ទៅ​ជាមួយ​នូវ​សេចក្តីព្រាង​ដែល​មាន​បញ្ជាក់​អំពី​ចំណុច​កែតម្រូវ (track changes) និង​បញ្ជាក់​ច្បាស់​ចំណុច​ដែល​ត្រូវកែប្រែ។ ឯកសារ​នេះ​ត្រូវបាន​ដាក់ចូល​ទៅក្នុង​សំណុំរឿង​ក្រោម​លេខ​សំណុំរឿង D11/2/3/corr-1 និង​ត្រូវបាន​ជូនដំណឹង​ដល់​ភាគី​នៃ​សំណុំរឿង​តាម​នីតិវិធី​ធម្មតា រួមទាំង​អ្នក​ដាក់​ពាក្យ​សុំ​តាំងខ្លួន​ជា​ដើមបណ្តឹង​រដ្ឋប្បវេណី​ម្នាក់នោះ​ផងដែរ។

- នៅក្នុង​ការ​កែតម្រូវ សហ​ចៅក្រម​ស៊ើបអង្កេត​មិនអាច​ប្តូរ​កាលបរិច្ឆេទ​នៃ​ការ​ចេញ​ដីកា​សម្រេច​របស់ខ្លួន​ឡើយ ដោយ​ត្រូវ​រក្សាទុក​នូវ​កាលបរិច្ឆេទ​នៃ​ការ​ចេញដីកា​សម្រេច​ដំបូង​ដដែល និង​ធ្វើការ​កែប្រែ​នូវ​ចំណុច​ឬ​ទំព័រ​ដែល​ត្រូវ​កែតម្រូវ​តែប៉ុណ្ណោះ ព្រោះ​នេះ​គឺជា​ការ​កែតម្រូវ​នូវ​ចំណុច​ភ័ន្តច្រឡំ​ខ្លះ និង​មិនមែន​ជា​ការ​ចេញដីកា​សម្រេច​ថ្មី​ជំនួស​ដីកាស​ម្រេច​ចាស់​នោះទេ។ ការ​អនុវត្ត​បែបនេះ​ក៏​ធ្លាប់​បាន​ធ្វើ​ឡើង​ដោយ​អង្គបុរេ​ជំនុំជម្រះ​ផងដែរ ដូចជា​នៅក្នុង​ឯកសារ​នៃ​ការ​កែតម្រូវ​ចុះ​ថ្ងៃទី៣ ខែធ្នូ ឆ្នាំ២០១០ (D402/1/4-Corr-1) ទៅលើ​សេចក្តី​សម្រេច​របស់​ខ្លួន​ចុះ​ថ្ងៃទី៣០ ខែវិច្ឆិកា ឆ្នាំ២០១០ (D402/1/4)។

ដើម្បី​ធានា​នូវ​តម្លាភាព និង​ដើម្បី​ជៀសវៀង​ការ​ធ្វើការ​បំផ្លើស​នានា​នៅក្នុង​បណ្តាញ​សារព័ត៌មាន សហ​ចៅក្រម​ស៊ើបអង្កេត​សូម​ធ្វើការ​ដាក់​ជា​សាធារណៈ​នូវ​ឯកសារ​ដែល​មាន​ពាក់ព័ន្ធ​នឹង​បញ្ហា​ខាងលើ​នេះ។ ឯកសារ​ទាំងអស់​នេះ​នឹង​ត្រូវ​ផ្សព្វផ្សាយ​នៅលើ​គេហទំព័រ​របស់ អ.វ.ត.ក. www.eccc.gov.kh។

 
បើក​សវនាការ​លើអង្គ​សេចក្តី​ក្នុងសំណុំរឿង​០០២ ​នៅថ្ងៃទី២១ ​ខែវិច្ឆិកា​

អង្គ​ជំនុំជម្រះ​សាលាដំបូង ​សូមប្រកាស​នៅថ្ងៃនេះថា ​សវនាការ​លើអង្គសេចក្តី​ដើម្បី​ជំនុំជម្រះ​សំណុំរឿង ​០០២ ​នឹងចាប់ផ្តើម​ធ្វើនៅថ្ងៃ ​ច័ន្ទ ទី ២១ ​ខែ វិច្ឆកា ​ឆ្នាំ ២០១១​ វេលា​ម៉ោង ​៩ ព្រឹក​ នៅសាលសវនាការ​នៃអង្គជំនុំជម្រះ​វិសាមញ្ញក្នុង​តុលាការ​កម្ពុជា​ (អ.វ.ត.ក) ​និង​បន្តធ្វើនៅ​ថ្ងៃបន្ត​បន្ទាប់ទៀត។ សវនាការ​ពិនិត្យ​លើភស្តុតាង​នៅក្នុង​សំណុំរឿងនេះ ​នឹងចាប់ផ្តើម​ធ្វើនៅថ្ងៃ ​ច័ន្ទ ទី២៨​ ខែវិច្ឆកា​ ឆ្នាំ២០១១។ ​ការបើកបើក​សវនាការ​លើអង្គសេចក្តីនេះ ​ត្រូវបានធ្វើឡើង​បន្ទាប់​ ពីអង្គជំនុំជម្រះសាលាដំបូងបានធ្វើសវនាការបឋមលើសំណុំរឿង ០០២ នេះ កាលពីថ្ងៃទី ២៧ រហូតដល់ថ្ងៃទី ៣០ ខែមិថុនា ឆ្នាំ ២០១១កន្លងទៅស្របតាមវិធានផ្ទៃក្នុងរបស់អវតក ។

សវនាការនៅថ្ងៃ ច័ន្ទ ទី ២១ ខែវិច្ឆកាឆ្នាំ២០១១ ខាងមុខនេះ​នឹងចាប់ផ្តើម​ធ្វើឡើង​ដោយការ​អាន​នូវបទចោទ​ប្រកាន់​ទាំងឡាយ​ប្រឆាំង​នឹង​ជនជាប់​ចោទ​នីមួយៗ។ បន្ទាប់​មក​ ​​សហព្រះរាជ​អាជ្ញា​​​នឹងត្រូវ​​បាន​ផ្តល់ជូន​នូវរយៈពេល២​(ពីរ)ថ្ងៃ ដើម្បី​ធ្វើសេចក្តី​សន្និដ្ឋាន​ចោទប្រកាន់​ប្រឆាំងនឹងជនជាប់ចោទ។​ ទោះបីជា​ពេលថ្មីៗនេះ​​​អង្គជំនុំជម្រះ​សាលាដំបូងបានបំបែកកិច្ចដំណើការ​នីតិវិធីនៅ​ក្នុងសំណុំរឿង​​ ០០២ ​ជាផ្នែកតូចៗ​ដើម្បីជំនុំជម្រះយ៉ាងណាក៏ដោយ ក៏ការជំនុំជម្រះលើកដំបូងនេះ​នឹងផ្តល់ជាមូលដ្ឋាន​គ្រឹះរួម​សម្រាប់​បទចោទប្រកាន់ទាំងឡាយ​ប្រឆាំងនឹង​ជនជាប់ចោទ​ រួមទាំង​បទចោទ​ប្រកាន់ ​ដែលនឹងត្រូវយកមកដេញដោលនៅក្នុងពេលជំនុំ ​ជម្រះលើកក្រោយៗទៀតផង។

ហេតុដូច្នេះ សហព្រះរាជអាជ្ញា ​នឹងធ្វើសេចក្តី​សន្និដ្ឋាន​ចោទប្រកាន់​ទាក់ទងនឹង​បទចោទប្រកាន់ទាំង​អស់ និងអង្គហេតុ​ដែលបាន​ចោទប្រកាន់​ទាំងអស់​ប្រឆាំង​នឹង​​​ជនជាប់ចោទ​នៅក្នុងសំណុំ​រឿង០០២។​ ​សហមេធាវី​តំណាងជនជាប់ចោទនីមួយៗ​នឹងត្រូវបាន​ផ្តល់ជូននូវឧិកាស​ដើម្បីធ្វើការឆ្លើយតប​ទៅនឹងសេចក្តីសន្និដ្ឋាន​​​​ចោទ​​ប្រកាន់​របស់សហព្រះរាជអាជ្ញា។​ សហមេធាវីតំណាង​ជនជាប់ចោទនីមួយៗ​ នឹងត្រូវបានផ្តល់ជូន​នូវរយៈពេល ​កន្លះថ្ងៃ​ ដើម្បីធ្វើការឆ្លើយតបទៅនឹងសេចក្តីសន្និដ្ឋានចោទប្រកាន់របស់សហព្រះរាជអាជ្ញាប្រឆាំងនឹងកូនក្តីរបស់ខ្លួន។

បន្ទាប់ពីការបើកសេចក្តីសន្និដ្ឋានចោទប្រកាន់ និង ការឆ្លើយតបត្រូវបានបញ្ចាប់ សវនាការដើម្បីពិនិត្យលើភស្តុតាងនៅក្នុងសំណុំរឿង ០០២ នឹងចាប់ផ្តើមធ្វើពីថ្ងៃ ច័ន្ទ ទី ២៨ ខែ វិច្ឆកា ឆ្នាំ ២០១១ វេលាម៉ោង ៩ ព្រឹក។ វគ្គដំបូងនៃការជំនុំជម្រះនេះនឹងត្រូវបញ្ចប់យ៉ាងយូរត្រឹមថ្ងៃសុក្រ ទី ១៦ ខែ ធ្នូ ឆ្នាំ ២០១១ ហើយបន្ទាប់ពីពេលនេះ អង្គជំនុំជម្រះនឹងឈប់សម្រាក សម្រាប់បុណ្យណូអែល និងបុណ្យចូលឆ្នាំសកល។ បន្ទាប់ពីការឈប់សម្រាក់នេះ អង្គជំនុំជម្រះសាលាដំបូងនឹងបន្តសវនាការចាប់ពីថ្ងៃ ច័ន្ទ ទី ៩ ខែមករា ឆ្នាំ ២០១២ ។ ការជំនុំជម្រះរបស់អង្គជំនុំជម្រះសាលាដំបូង នឹងត្រូវធ្វើឡើងជាសាធារណៈឲ្យបានច្រើនបំផុត តាមដែលអាចធ្វើទៅបាន។

អង្គជំនុំជម្រះសាលាដំបូង នឹងជូនព័ត៌មានបន្ថែមទៀតទាក់ទងនឹងការកំណត់ពេលវេលានៃ ការជំនុំជម្រះនៃវគ្គក្រោយៗទៀត ក្នុងរយៈពេលមួយសមស្រប។

 
<< ចាប់ផ្ដើម < មុន 1 2 3 4 5 6 បន្ទាប់ > ចុងក្រោយ >>

ទំព័រ​ទី 5 ​ទាំងអស់ 6 ទំព័រ
Victims Support Section of the ECCC