ភាសាខ្មែរភាសាអង់គ្លេស
Home ទំព័រដើម ព័ត៌មានថ្មីៗ
ព័ត៌មានថ្មីៗ


ព័ត៌មាន​សម្រាប់​ការ​ចូលរួម​របស់​សាធារណជន​និង​អ្នកសារព័ត៌មាន​ក្នុង​សវនាការ​លើ​សំណុំរឿង ០០២ ​ថ្ងៃទី ១៩-២០ ខែតុលា ឆ្នាំ២០១១

អង្គជំនុំ​ជម្រះ​សាលា​ដំបូង​នៃ​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា (អ.វ.ត.ក) នឹង​រៀបចំ​សវនាការ​សាធារណៈ​ចំនួន​២ ទៅ​លើ​សំណើ​បឋម​នៃ​ការ​ទាមទារ​សំណង​របស់​ដើម​បណ្តឹង​រដ្ឋប្បវេណី និង​ទៅ​លើ​បញ្ហា​កាយសម្បទា​របស់​លោកស្រី អៀង ធីរិទ្ធ ក្នុង​ការ​ចូលរួម​ការ​ជំនុំ​ជម្រះ​ក្តី ដែល​នឹង​ប្រព្រឹត្ត​ទៅ​នៅ​ថ្ងៃទី​១៩-២០ ខែតុលា ឆ្នាំ២០១១។

សវនាការ​សាធារណៈ​ទាក់ទង​នឹង​ការ​ទាមទារ​សំណង​ដែល​នឹង​លើក​ឡើង​ដោយ​សហមេធាវី​នាំមុខ​តំណាង​ដើម​បណ្តឹង​រដ្ឋប្បវេណី នឹង​ប្រព្រឹត្ត​ទៅ​នៅ​ថ្ងៃទី​១៩ ខែតុលា ឆ្នាំ២០១១ ចាប់​ពី​ម៉ោង ៩:០០ ព្រឹក។ សហ​មេធាវី​នាំមុខ​តំណាង​ដើម​បណ្តឹង​រដ្ឋប្បវេណី​នឹង​មាន​ពេល​វេលា​ ៣ម៉ោង សម្រាប់​លើក​ឡើង​នូវ​ការ​ទាមទារ​របស់​ខ្លួន។

បន្ទាប់​ពី​សន្និដ្ឋាន​បញ្ចប់​សំណើ​របស់​មេធាវី​នាំមុខ​តំណាង​ដើម​បណ្តឹង​រដ្ឋប្បវេណី អង្គ​ជំនុំ​ជម្រះ​សាលា​ដំបូង​នឹង​ចាប់ផ្តើម​សវនាការ​លើ​បញ្ហា​កាយសម្បទា​របស់​លោកស្រី អៀង ធីរិទ្ធ ក្នុង​ការ​ចូលរួម​ការ​ជំនុំជម្រះ​ក្តី។ អង្គ​ជំនុំជម្រះ​សាលា​ដំបូង​នឹង​ចាប់ផ្តើម​សវនាការ​ដោយ​សួរ​សំណួរ​ទៅ​អ្នក​ជំនាញ​ផ្នែក​ចិត្តសាស្រ្ត បន្ទាប់​មក​នឹង​អនុញ្ញាត​ឲ្យ​ភាគី​ដែល​ពាក់ព័ន្ធ​សួរ​សំណួរ​ទៅ​អ្នក​ជំនាញ។ ប្រសិន​បើ​មាន​សំណូមពរ​ពី​ភាគី​ដែល​ពាក់ព័ន្ធ អង្គ​ជំនុំជម្រះ​នឹង​ស្តាប់​ការ​វែកញែក​ដោយ​ផ្ទាល់មាត់​ពាក់ព័ន្ធ​នឹង​បទដ្ឋាន​ច្បាប់​ដែល​សមស្រប​ក្នុង​ការ​ប្រើប្រាស់​សម្រាប់​វិនិច្ឆ័យ​ទៅលើ​កាយសម្បទា​របស់​លោកស្រី អៀង ធីរិទ្ធ ក្នុង​ការ​ចូលរួម​ការ​ជំនុំ​ជម្រះ​ក្តី។ សវនាការ​នេះ​នឹង​ចាប់ផ្តើម​ពីម៉ោង ១:៣០នាទី រសៀល​នៃថ្ងៃ​ទី១៩ ខែតុលា នៅ​ក្នុង​សាលសវនាការ​ធំ ហើយ​ប្រសិន​បើ​មាន​តម្រូវការ​ចាំបាច់ នឹង​បន្ត​ទៅ​ថ្ងៃ​បន្ទាប់។

អង្គ​ជំនុំ​ជម្រះ​សាលា​ដំបូង​បាន​សម្រេច​ដោយ​យោង​ទៅ​លើ​មាត្រា ៧៩(៦) នៃ​វិធាន​ផ្ទៃក្នុង ថា សវនាការ​លើ​កាយសម្បទា​ក្នុង​ការ​ចូលរួម​ការ​ជំនុំជម្រះ​ក្តី នឹង​ប្រព្រឹត្ត​ទៅ​ជា​សាធារណៈ ហើយ​ការ​វែកញែក​នីមួយៗ​នឹង​មាន​លក្ខណៈ​បើក​ចំហ​តាម​ដែល​អាច​ធ្វើបាន។ ទោះ​ជា​យ៉ាងនេះ​ក្តី អង្គ​ជំនុំ​ជម្រះ​សាលា​ដំបូង​ក៏​បាន​ពិចារណា​ដល់​ការ​គោរព​សិទ្ធិ​របស់​ជន​ជាប់ចោទ ក្នុង​ការ​រក្សា​ជា​សម្ងាត់​នូវ​ព័ត៌មាន​ទាក់ទង​នឹង​បញ្ហា​សុខភាព ដែល​ផ្ទុយ​នឹង​សិទ្ធិ​របស់​សាធារណជន​ក្នុង​ការ​ទទួល​បាន​ព័ត៌មាន​អំពី​លក្ខខណ្ឌ​ជា​មូលដ្ឋាន​ដែល​នឹង​នាំ​ដល់​ការ​វិនិច្ឆ័យ​ទៅ​លើ​កាយសម្បទា​ក្នុង​ការ​ចូលរួម​ការ​ជំនុំជម្រះ​ក្តី។ សវនាការ​នឹង​ចាប់ផ្តើម​ក្នុង​លក្ខណៈ​ជា​សាធារណៈ។ នៅ​ពេលណា​ដែល​ភាគី​ណាមួយ​មាន​តម្រូវការ​ឲ្យ​មាន​ការ​វែកញែក​ជា​សម្ងាត់ ភាគី​នោះ​ត្រូវ​ធ្វើ​ញត្តិ​ផ្ទាល់​មាត់​​ទៅអង្គជំនុំជម្រះ។ ញត្តិ​នេះ​នឹង​ត្រូវ​លើក​ឡើង​ជា​សាធារណៈ ហើយ​អង្គ​ជំនុំ​ជម្រះ​នឹង​អនុញ្ញាត​ប្រសិនបើ​យល់​ឃើញ​ថា​សំណូមពរ​នេះ​ជា​ផលប្រយោជន៍​នៃ​យុត្តិធម៌។

ព័ត៌មាន​សម្រាប់​សាធារណជន​ដែល​ចូលរួម​ស្តាប់​សវនាការ

សាលសវនាការ​នៃ អ.វ.ត.ក មាន​កន្លែង​អង្គុយ​ចំនួន ៤៨២កន្លែង។ កន្លែង​អង្គុយ​ចំនួន ១៤០ នឹង​ត្រូវ​ត្រៀម​បម្រុង​សម្រាប់​ដើម​បណ្តឹង​រដ្ឋប្បវេណី​នៃ​សំណុំរឿង ០០២  សម្រាប់​អង្គទូត និង​សម្រាប់​អ្នក​សារព័ត៌មាន។ កន្លែង​អង្គុយ​ដែល​នៅ​សេសសល់​នឹង​ផ្តល់​ជូន​សាធារណជន​ដែល​មក​ជា​លក្ខណៈ​បុគ្គល តាម​គោលការណ៍​មក​មុន​បាន​មុន។ អង្គការ​ក្រៅ​រដ្ឋាភិបាល សាលារៀន ឬអង្គភាព​ដទៃ​ទៀត ដែល​មាន​បំណង​នាំ​ភ្ញៀវ​មក​ជា​ក្រុម សូម​ជូន​ដំណឹង​ជាមុន​មក​ផ្នែក​កិច្ចការ​សាធារណៈ​នៃ អ.វ.ត.ក តាម​រយៈ​សារ​អេឡិកត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

ភ្ញៀវ​ជា​អង្គទូត​ដែល​មាន​បំណង​កក់​កន្លែង​អង្គុយ សូម​មេត្តា​ទាក់ទង​ផ្នែក​កិច្ចការ​សាធារណៈ​ជាមុន តាម​រយៈ​សារអេឡិកត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

អ្នក​ចូលរួម​គួរតែ​មក​ដល់ អ.វ.ត.ក ចន្លោះ​ពី​ម៉ោង ៧:៣០ ដល់​ម៉ោង ៨:០០ ដើម្បី​ទុក​ពេល​វេលា​សមស្រប​សម្រាប់​ការ​ចែក​សំបុត្រ​ចូល​និង​ការ​ត្រួតពិនិត្យ​សន្តិសុខ។ អ.វ.ត.ក នឹង​បិទ​ច្រកចូល​ទៅ​កាន់​សាលសវនាការ​នៅម៉ោង ៨:៤៥ ឬ​នៅ​ពេល​ដែល​សាលសវនាការ​មាន​មនុស្ស​អង្គុយ​ពេញ។

ដើម្បី​ចូល​ក្នុង​សាលសវនាការ អ្នក​ចូលរួម​ត្រូវតែ​បង្ហាញប័ណ្ណ​សម្គាល់​ខ្លួន​ដែល​មាន​បិទ​រូបថត​ដល់​សន្តិសុខ​នៅ​មាត់ទ្វារ​ខាងក្រៅ។ សូម​រំឭក​ថា អ្នក​ដែល​មាន​អាយុ​ក្រោម​១៦ឆ្នាំ​នឹង​មិន​ត្រូវ​បាន​អនុញ្ញាត​ឲ្យ​ចូលរួម​ឡើយ ហើយ​អ្នក​ដែល​មាន​អាយុ​ចន្លោះ​ពី​១៦​ដល់​១៨ឆ្នាំ អាច​ចូល​បាន​លុះត្រាតែ​មាន​មនុស្ស​ចាស់​មក​ជាមួយ។ សាធារណជន​ត្រូវតែ​មាន​អាកប្បកិរិយា​ថ្លៃថ្នូរ​និង​សមរម្យ​គ្រប់​ពេល​វេលា និង​ត្រូវ​មាន​សម្លៀក​បំពាក់​សមរម្យ។ មិន​អនុញ្ញាត​ឲ្យ​យក​ទូរស័ព្ទ​ដៃ ម៉ាស៊ីន​ថតរូប កុំព្យូទ័រ​យួរដៃ ឧបករណ៍​ថត​សំឡេង កាបូប​ធំៗ អាហារ​ឬភេសជ្ជៈ ចូល​ក្នុង​សាលសវនាការ​ឡើយ។

អ.វ.ត.ក មាន​ទីតាំង​នៅ​សង្កាត់​ចោមចៅ ចម្ងាយ​ ១៦គីឡូម៉ែត្រ ពី​រាជធានី​ភ្នំពេញ ខាងឆ្វេង​ផ្លូវជាតិ​លេខ៤។ សូម​អញ្ជើញ​​សាធារណជន​និង​តំណាង​សារព័ត៌មាន​​ចូល​​តាម​​ច្រក​​សម្រាប់​ភ្ញៀវ​ដែល​ស្ថិត​នៅ​ផ្នែក​ខាងកើត​នៃ អ.វ.ត.ក។ អ.វ.ត.ក មាន​ទីធ្លា​សម្រាប់​ភ្ញៀវ​ចត​យានយន្ត។

ការ​ចុះ​ឈ្មោះ​សុំ​ប័ណ្ណព័ត៌មាន​សម្រាប់​អ្នកសារព័ត៌មាន

អ្នកសារព័ត៌មាន​ដែល​មាន​បំណង​ចូលរួម​តាមដាន​ដំណើរការ​សវនាការ​ដោយ​ផ្ទាល់ ត្រូវតែ​មាន​ប័ណ្ណ​សម្រាប់​អ្នកសារព័ត៌មាន និង​ត្រូវ​ចុះឈ្មោះ​ជាមុន។ សូម​អនុវត្ត​តាម​លក្ខខណ្ឌ​ខាងក្រោម​ដើម្បី​សុំ​ប័ណ្ណព័ត៌មាន៖

ក) អ្នកសារព័ត៌មាន​ដែល​កំពុង​កាន់​ប័ណ្ណព័ត៌មាន​មាន​សុពលភាព​ជា​ផ្លូវការ​របស់ អ.វ.ត.ក ត្រូវ​ចុះ​ឈ្មោះ​នៅ​ផ្នែក​កិច្ចការ​សាធារណៈ​តាម​រយៈ​ការ​ផ្ញើ​សារ​អេឡិចត្រូនិក​ទៅកាន់ អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

ខ) អ្នកសារព័ត៌មាន​ដែល​មាន​ប័ណ្ណព័ត៌មាន​ជា​ផ្លូវការ​របស់ អ.វ.ត.ក ប៉ុន្តែ​ផុត​កំណត់ ត្រូវ​បំពេញ​ទម្រង់​បែបបទ​សុំប័ណ្ណព័ត៌មាន​សាជាថ្មី (ដោយ​មាន​ចុះហត្ថលេខា​ផង) និង​ផ្ញើ​មក​ជាមួយ​នឹង​សំណើ​សុំចុះ​ឈ្មោះ​តាម​រយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។ ។ សូម​កុំ​ភ្លេច​បញ្ជាក់​លេខ​ប័ណ្ណចាស់​ដែល​ផុត​កំណត់។

គ) អ្នកសារព័ត៌មាន​ដែល​មិនទាន់​មាន​ប័ណ្ណព័ត៌មាន​ដែល​ចេញ​ដោយ អ.វ.ត.ក ត្រូវ​បំពេញ​ទម្រង់​បែបបទ​សុំ​ប័ណ្ណសារព័ត៌មាន និង​ភ្ជាប់​រូបថត​ទម្រង់ jpg មួយសន្លឹក ផ្ញើ​មក​ជាមួយ​សំណើសុំ​ចុះ​ឈ្មោះ​តាម​រយៈ​សារអេឡិចត្រូនិក អាសយដ្ឋាន​អ៊ីមែល​នេះ​ត្រូវ​បាន​ការពារ​ពី​សំបុត្រ​​ឥត​ប្រយោជន៍​ផ្សេងៗ។ អ្នក​ត្រូវ​ការ​អនុញ្ញាត JavaScript ដើម្បី​មើល​វា។

ទម្រង់​បែបបទ​សម្រាប់​សុំ​ប័ណ្ណព័ត៌មាន អាច​ទាញ​យក​បាន​ពី​គេហទំព័រ​របស់ អ.វ.ត.កៈ http://www.eccc.gov.kh/sites/default/files/ECCC_Accreditation_Media_Appl....

កន្លែង​អង្គុយ​ក្នុង​សាលសវនាការ​ដែល​ត្រៀម​បម្រុង​សម្រាប់​អ្នកសារព័ត៌មាន

អ.វ.ត.ក ត្រៀម​បម្រុង​កន្លែង​អង្គុយ​ចំនួន ៣០កន្លែង នៅក្នុង​សាលសវនាការ​សម្រាប់​អ្នកសារព័ត៌មាន។ អាទិភាព​នឹង​ត្រូវ​បាន​ផ្តល់​ជូន​អ្នកសារព័ត៌មាន​ខាងផ្នែក​បោះពុម្ព។ អ្នកសារព័ត៌មាន​ដទៃទៀត​នឹង​ត្រូវ​រៀបចំ​ជូន​កន្លែង​អង្គុយ​ក្នុង​បន្ទប់​សារព័ត៌មាន​នៅ​ជាន់​ផ្ទាល់ដី។ តំណាង​សារព័ត៌មាន​ដែល​មាន​បំណង​ទទួល​បាន​កន្លែង​អង្គុយ​ក្នុង​សាលសវនាការ ត្រូវ​ធ្វើ​សំណើ​សុំ​កន្លែង​អង្គុយ​ព្រមគ្នា​ជាមួយ​នឹង​សំណើ​សុំ​ចុះ​ឈ្មោះ​សម្រាប់​ការ​ចូលរួម​ស្តាប់​សវនាការ។

អ្នកសារព័ត៌មាន​ត្រូវតែ​មក​ដល់​កន្លែង​អង្គុយ​របស់ខ្លួន​ឲ្យ​បាន ១៥នាទី មុន​ពេល​បើក​សវនាការ។ ពុំ​អនុញ្ញាត​ឲ្យ​យក​ម៉ាស៊ីន​ថតរូប កុំព្យូទ័រយួរដៃ ទូរស័ព្ទដៃ ឬ​ឧបករណ៍​ថតសំឡេង ចូល​ក្នុង​សាលសវនាការ​ឡើយ។

ថ្ងៃ​ផុត​កំណត់​ឈប់​ទទួល​ការ​ចុះ​ឈ្មោះ​អ្នកសារព័ត៌មាន៖ ថ្ងៃអង្គារ ទី១៨ ខែតុលា ឆ្នាំ២០១១។
 
ការ​ផ្តល់​ជូន​អ្នកសារព័ត៌មាន
ផ្នែក​កិច្ចការ​សាធារណៈ​នៃ អ.វ.ត.ក នឹង​ផ្តល់​មធ្យោបាយ​នានា​នៅ​ជាន់​ផ្ទាល់ដី​នៃ​អគារ​សវនាការ ដើម្បី​ជួយ​សម្រួល​ដល់​អ្នកសារព័ត៌មាន​ក្នុង​អំឡុងពេល​សវនាការ។

នៅក្នុង​បន្ទប់​ការងារ​ព័ត៌មាន (លេខ C១០៨) នៅ​ជាន់​ផ្ទាល់ដី​នៃ​អគារ​សវនាការ មាន​ទី​កន្លែង​ស្ងប់ស្ងាត់​សម្រាប់​ធ្វើការ និង​មាន​កុំព្យូទ័រ​មួយ​ចំនួន​ដែល​ភ្ចាប់​ប្រព័ន្ធ​អ៊ីនធឺណិត​រួច​ជា​ស្រេច សម្រាប់​អ្នក​សារព័ត៌មាន​ប្រើប្រាស់​តាម​គោលការណ៍​មក​មុន​បាន​មុន។ អ្នកសារព័ត៌មាន​អាច​យក​កុំព្យូទ័រ​យួរដៃ​ផ្ទាល់ខ្លួន​មក​ប្រើប្រាស់​នៅ​ទីនេះ​បាន ក៏ប៉ុន្តែ​ពុំ​អនុញ្ញាត​ឲ្យ​ភ្ជាប់​ទៅនឹង​បណ្តាញ​អ៊ីនធឺណិត​ឬ​បណ្តាញ​កុំព្យូទ័រ​របស់ អ.វ.ត.ក ឡើយ។ សូម​បញ្ជាក់​ថា សេវា​អ៊ីនធឺណិត​គ្មានខ្សែ​នៅ អ.វ.ត.ក នៅ​មាន​កម្រិត​នៅឡើយ ដូច្នេះ​អ្នក​សារព័ត៌មាន​គួរតែ​យក 3G modems ផ្ទាល់ខ្លួន​មក​ជាមួយ។

នឹង​មាន​ការ​ផ្តល់​ការ​ផ្សាយ​បន្តផ្ទាល់​ជា​វីដេអូ​និង​សំឡេង​អំពី​ដំណើរការ​សវនាការ នៅ​ក្នុង​បន្ទប់​សម្រាប់​អ្នកសារព័ត៌មាន (C-១០៥) ដែល​ស្ថិត​នៅ​ជាន់​ផ្ទាល់ដី​នៃ​សាលសវនាការ។ ការ​ផ្សាយ​បន្តផ្ទាល់​ជា​ភាសាខ្មែរ​នៅក្នុង​បន្ទប់ C១០៩ និង​ភាសា​អង់គ្លេស​នៅក្នុង​បន្ទប់ C១០៥ សម្រាប់​តែ​អ្នកសារព័ត៌មាន​ប៉ុណ្ណោះ។

ការ​ថត​រូបភាព
ផ្នែក​កិច្ចការ​សាធារណៈ​នៃ អ.វ.ត.ក នឹង​ផ្តល់​រូបភាព​ជូន​អ្នកសារព័ត៌មាន​នៅ​ពេល​ចាប់ផ្តើម​សវនាការ។

ការថតសំឡេង

ឧបករណ៍​សម្រាប់​ថតសំឡេង​នៃ​ដំណើរការ​សវនាការ​នឹង​ត្រូវ​បាន​ផ្តល់​ជូន​អ្នកសារព័ត៌មាន​តាម​ប្រព័ន្ធ PHONO/XLR។ ឧបករណ៍​ថតសំលេង​នេះ​អាច​ប្រើប្រាស់​បាន​នៅ​ក្នុង​បន្ទប់​តាមដាន​ព័ត៌មាន (លេខ ១០៥) ដោយ​ប្រើ​ឧបករណ៍​ភ្ជាប់​មួយ​ក្នុង​ចំណោម​ឧបករណ៍​ភ្ជាប់​ចំនួន ៤៨ (មាន​ឧបករណ៍​ភ្ជាប់​ចំនួន​១៦​សម្រាប់​ភាសា​នីមួយៗ មានខ្មែរ អង់គ្លេស និងបារាំង)។ ឧបករណ័​ភ្ជាប់​បន្ថែម​លើសពីនេះ​សម្រាប់​ភ្ជាប់​ពី​ម៉ាស៊ីន​ថតសំឡេង​មួយ​ទៅ​ម៉ាស៊ីន​ថតសំឡេង​មួយ​ទៀត អាច​ផ្តល់​ជូន​បាន​ប្រសិនបើ​អ្នកសារព័ត៌មាន​មាន​ខ្សែកាប​សម្រាប់​ភ្ជាប់។ ពុំ​អនុញ្ញាត​ឲ្យ​ថត​សំឡេង​នៅ​ក្នុង​សាលសវនាការ​ឡើយ។

ការថតវីដេអូ
ឧបករណ៍​សម្រាប់​ចម្លង​វីដេអូ​អំពី​ដំណើរការ​សវនាការ​នឹង​ត្រូវបាន​ផ្តល់​ជូន​តាម​ប្រព័ន្ធ BNC (PAL signal) ។ ការ​ថត​ចម្លង​វីដេអូ​អាច​ធ្វើ​បាន​នៅ​ក្នុង​បន្ទប់​តាមដាន​ព័ត៌មាន (លេខ ១០៥) ដោយ​ប្រើប្រាស់​ឧបករណ៍​ភ្ជាប់​មួយ​ក្នុង​ចំណោម​ឧបករណ៍​ភ្ជាប់​ចំនួន​១០​ដែល​មាន​នៅ​ទីនោះ។ ឧបករណ៍​ភ្ជាប់​បន្ថែម​អាច​ផ្តល់​ជូន​បាន​ប្រសិនបើ​អ្នកសារព័ត៌មាន​មាន​ខ្សែកាប​សម្រាប់​ភ្ជាប់។ ពុំ​អនុញ្ញាត​ឲ្យ​ថត​វីដេអូ​នៅក្នុង​សាលសវនាការ​ឡើយ។

សំណុំរឿង០០២ ជាសំណុំរឿងទី២នៅចំពោះមុខអង្គជំនុំជម្រះវិសាមញ្ញក្នុងតុលាការ ប្រឆាំងនឹងជនជាប់ចោទចំនួនបួនរូប។
- នួន ជា អាយុ៨៤ឆ្នាំ អតីតអនុលេខាបក្សកុម្មុយនីស្តកម្ពុជា
- អៀង សារី អាយុ៨៥ឆ្នាំ អតីតរដ្ឋមន្រ្តីក្រសួងការបរទេស
- ខៀវ សំផន អាយុ៧៩ឆ្នាំ អតីតប្រមុខរដ្ឋកម្ពុជាប្រជាធិបតេយ្យ
- អៀង ធីរិទ្ធ អាយុ៧៨ឆ្នាំ អតីតរដ្ឋមន្រ្តីក្រសួងសង្គមកិច្ច
1Khmer
ប្រភពៈ http://www.eccc.gov.kh/articles/15746

 
អង្គជំនុំជម្រះ​សាលាដំបូង​សម្រេចបំបែក​កិច្ចដំណើរការ​នីតិវីធី​ក្នុងសំណុំ​រឿង ០០២​

នៅថ្ងៃនេះ អង្គជំនុំជម្រះ​សាលាដំបូង​នៃ អ.វ.ត.ក ​បានសម្រេច​បំបែកសំណុំរឿង ​០០២ ​ជាផ្នែកតូចៗ​ដើម្បីជំនុំជម្រះ​ និងវិនិច្ឆ័យ​សេចក្តីដាច់​ដោយឡែក​ពីគ្នា។​ អង្គជំនុំជម្រះ​សូមប្រកាស​ផងដែរថា​ កម្មវត្ថុ​នៃការជំនុំជម្រះ​នៅ​ដំណាក់កាល​ដំបូងនេះ ​ជាមូលដ្ឋាន​ គឺពាក់ព័ន្ធទៅនឹង​ការផ្លាស់ទីលំនៅ​ប្រជាជន​ដោយបង្ខំ​ និង​ឧក្រិដ្ឋកម្ម​ប្រឆាំងនឹង​មនុស្សជាតិ។​

ការបំបែក​កិច្ចដំណើរការ​នីតិវិធី ​ជាផ្នែកៗនេះ ​គឺមានអត្ថប្រយោជន៍​ធ្វើឲ្យ​អង្គជំនុំជម្រះ​សាលាដំបូង​មិនចំណាយ​ពេលវេលា​ច្រើនក្នុងការ​បញ្ចប់ការជំនុំជម្រះ​នីមួយៗ។​ នៅពេល​ចប់ការជំនុំជម្រះ​នីមួយៗ ​អង្គជំនុំជម្រះ​នឹងចេញសាលក្រម​ ដោយផ្តន្ទាទោស​សមស្រប​ ក្នុងករណីរកឃើញថា​ មានពិរុទ្ធភាព។

ដីកាសម្រេច​ដែលចេញនៅថ្ងៃនេះ ​គឺអនុវត្តតាម​វិធានថ្មីមួយ​ដែលត្រូវបាន​អនុម័តដោយ​កិច្ចប្រជុំពេញ​អង្គ អ.វ.ត.ក ​កាលពីក្នុងខែ ​កុម្ភៈ ឆ្នាំ ​២០១១​  ដែល​ផ្តល់លទ្ធភាព​ឲ្យ​អង្គជំនុំជម្រះ​ដំណើរការ​នីតិវិធីជំនុំជម្រះ​ លើផ្នែកតូចៗ​នៃដីកា​បញ្ជូនរឿង​ទៅជំនុំជម្រះ​បាន ​ប្រសិនបើខ្លួន​យល់ឃើញថា ​ដើម្បីជាប្រយោជន៍​នៃយុត្តិធម៌។​ ក្រោយ​ពីបំបែក​កិច្ចដំណើរ​ការនីតិវិធី​ អង្គជំនុំជម្រះ​នឹងមិនបោះបង់ចោល​ផ្នែកដែលនៅ​សេសសល់​ ដែលមាននៅ​ក្នុងដីកាបញ្ជូនរឿង​ទៅជំនុំជម្រះឡើយ។ ​ផ្នែកដែលនៅ​សេសសល់​ទាំងអស់នោះ​គឺជាកម្មវត្ថុ​នៃការជំនុំជម្រះ​នៅដំណាក់កាល​បន្ទាប់ទៀត។

វិធាននេះ​ក៏អនុញ្ញាតឲ្យ​អង្គជំនុំជម្រះ​បំបែកការជំនុំជម្រះ​ពាក់ព័ន្ធនឹង​ជនជាប់ចោទ​ម្នាក់ ​ឬ ច្រើននាក់ផងដែរ។ ​ថ្វីត្បិត ​នៅពេលបច្ចុប្បន្ននេះ​ អង្គជំនុំជម្រះ​កំពុងពិចារណា​ទៅលើការ​ជំទាស់នានា​អំពីបញ្ហាកាយ​សម្បទា ​និងបញ្ញាស្មារតី​ របស់ជនជាប់ចោទ​ពីររូប​ ក្នុងការចូល​រួមសវនាការក្តី​ ក៏អង្គជំនុំជម្រះ​មិនទាន់បានចេញ​សេចក្តីសម្រេច​ណាមួយ​លើបញ្ហានេះ​នៅឡើយទេ។​ ហេតុដូច្នេះ ​អង្គជំនុំជម្រះ​សូមបញ្ជាក់ថា ​ដីកាដែលចេញនៅថ្ងៃនេះ​គឺពាក់ព័ន្ធត្រឹមតែ​ទៅនឹង​លំដាប់លំដោយ​នៃសំណុំរឿង​ ០០២​ និងវិសាលភាព​នៃអង្គហេតុ​   និងអង្គច្បាប់​សម្រាប់ការជំនុំជម្រះ​នៅដំណាក់កាល​ដំបូងនេះតែប៉ុណ្ណោះ។

នៅក្នុងការ​សម្រេចចាប់ផ្តើម​បើកសវនាការ​ដំណាក់កាល​ដំបូងលើបញ្ហា​ស្តីពីការផ្លាស់​ទីលំនៅប្រជាជន​ដោយបង្ខំ​ និងឧក្រិដ្ឋកម្ម​ប្រឆាំងនឹង​មនុស្សជាតិ​ អង្គជំនុំជម្រះ​នឹងខិតខំ​ធ្វើយ៉ាងណា​ឲ្យការជំនុំជម្រះ​នាពេលខាង​មុខបំពេញ​តាមកាល​ប្បវត្តិ​ និងលំដាប់លំដោយ​ត្រឹមត្រូវ​នៃដីកា​ដំណោះស្រាយក្នុង​សំណុំរឿង ​០០២​ និងចាប់ផ្តើម​ពីរយៈកាល​ដើមដំបូង​បំផុតដូច​មាននៅក្នុង​ដីកាបញ្ជូនរឿង​ទៅជំនុំជម្រះ ​(ចន្លោះឆ្នាំ ​១៩៧៥-១៩៧៦)​ ហើយធានាថា​ បញ្ហាទាំងឡាយ​ដែលលើក​យកមកពិនិត្យ​ដេញដោល​នៅក្នុងសវនាការ​ដំណាក់កាល​ដំបូងនេះ​នឹងផ្តល់ជាមូលដ្ឋាន​សម្រាប់​ការពិចារណា​អំពីតួនាទី ​និងការទទួលខុស​ត្រូវរបស់ជនជាប់ចោទ​ទាំងអស់​ ក៏ដូចជា​ដើម្បីផ្តល់ជា​មូលដ្ឋានគ្រឹះ​សម្រាប់ការជំនុំជម្រះ​លើបទចោទ​ដែលនៅសេសសល់​នៅដំណាក់កាល​ក្រោយៗទៀត។​ ការផ្លាស់ទីលំនៅ​ប្រជាជន​ដោយបង្ខំ​ក្នុងអំឡុង​ពេលខាង​លើក៏បានប៉ះពាល់​មកលើ​ប្រជាជនកម្ពុជា​ទូទាំងប្រទេស ​រួមទាំងដើម​បណ្តឹង​រដ្ឋប្បវេណី​មួយចំនួនធំ​នៅក្នុងសំណុំរឿង ​០០២ ផងដែរ។

នៅក្នុង​បរិបទពិសេស​នៃអ.វ.ត.ក​ ការបំបែកដំណើរការ​នីតិវិធីនឹងជួយ​ដល់អង្គជំនុំជម្រះ​ឲ្យការពារ​បាននូវផល​ប្រយោជន៍​របស់ជនរងគ្រោះ​ក្នុងការទទួលបាននូវ​យុត្តិធម៌​​ប្រកប​ដោយ​អត្ថន័យ ​និងទាន់ពេលវេលា ​ក៏ដូចជាដើម្បី​ការពារសិទ្ធិ​របស់ជនជាប់ចោទ​ទាំងអស់​ក្នុងសំណុំរឿង​០០២​ ក្នុងការទទួល​បានការជំនុំជម្រះ​ដោយ​ឆាប់រហ័ស​ផងដែរ។​  បទពិសោធន៍​របស់តុលាការ​អន្តរជាតិនានា ​កន្លងមក ​បានបង្ហាញថា​ ប្រសិន​បើមិនធ្វើការបំបែក​នីតិវិធី​នៅក្នុងរឿងក្តី​ដែលមាន​លក្ខណៈ​ស្មុគស្មាញ​ ស្រដៀងគ្នា​នឹងសំណុំរឿង ​០០២ ​នេះទេ ​តុលាការទាំងនោះ ​ភាគច្រើន​ ត្រូវការ​ពេលវេលា​រហូតទៅដល់១០​ ឆ្នាំ ​ទើបចេញ​សាលក្រមបាន​។

នៅពេល​ឆាប់ៗខាងមុខ អង្គជំនុំជម្រះ​សាលាដំបូង​នឹងផ្តល់ជូន​បន្ថែមនូវផ្នែកលម្អិត​នានានៃដីកា​បញ្ជូនរឿង​ទៅជំនុំជម្រះ​ពាក់ព័ន្ធនឹង​ការជំនុំជម្រះ​ដំណាក់កាល​ដំបូងនេះ។​ អង្គជំនុំ​ជម្រះនឹង​ជូនព័ត៌មាន​ទាក់ទង​នឹងការជំនុំជម្រះ​ដំណាក់កាល​បន្ទាប់ក្នុង​សំណុំរឿង​ ០០២​ លើផ្នែកដែលនៅ​សេសសល់ដែល​មាននៅក្នុង​ដីកាបញ្ជូន​រឿងទៅជំនុំ​ជម្រះ ​ (ដែលក្នុង​នោះមានផ្នែក​ស្តីពីសហករណ៍,​ ការដ្ឋាន, ​មន្ទីរសន្តិសុខ​, កន្លែង​សម្លាប់មនុស្ស ​និងឧក្រិដ្ឋកម្មផ្សេងៗ​ទៀត ​រួមទាំង​ឧក្រិដ្ឋកម្ម​ប្រល័យពូជ​សាសន៍ផង)​ នៅពេល​ក្រោយ។
ប្រភពៈ http://www.eccc.gov.kh/articles/15577

 
<< ចាប់ផ្ដើម < មុន 1 2 3 4 5 6 បន្ទាប់ > ចុងក្រោយ >>

ទំព័រ​ទី 6 ​ទាំងអស់ 6 ទំព័រ
Victims Support Section of the ECCC