ភាសាខ្មែរភាសាអង់គ្លេស
Home ទំព័រដើម ព័ត៌មានថ្មីៗ
ព័ត៌មានថ្មីៗ


អង្គជំនុំជម្រះ​តុលាការ​កំពូល​សម្រេច​ផ្តន្ទាទោស កាំង ហ្កេកអ៊ាវ ហៅ ឌុច ដាក់​ពន្ធនាគារ​អស់​មួយ​ជីវិត

ថ្ងៃនេះ អង្គជំនុំជម្រះ​តុលាការ​កំពូល​នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា (អ.វ.ត.ក) បាន​សម្រេច​ផ្តន្ទាទោស កាំង ហ្កេកអ៊ាវ ហៅ ឌុច ដាក់​ពន្ធនាគារ​អស់​មួយជីវិត ជា​ទោស​អតិបរមា ដែល​មាន​ចែង​ក្នុង​ច្បាប់​ពី​បទឧក្រិដ្ឋកម្ម​ប្រឆាំង​មនុស្សជាតិ និង​ការ​បំពារ​បំពាន​យ៉ាង​ធ្ងន់ធ្ងរ​លើ​អនុសញ្ញា​ទីក្រុង​ហ្សឺណែវឆ្នាំ​១៩៤៩។

ដោយ​បាន​ទទួល​យក​បណ្តឹង​សាទុក្ខ​របស់​សហ​ព្រះរាជ​អាជ្ញា អង្គជំនុំជម្រះ​តុលាការ​កំពូល​សម្រេច​បដិសេធ​ចោល​ការ​ផ្តន្ទាទោស​ដាក់​ពន្ធនាគារ ៣៥ឆ្នាំ របស់​អង្គជំនុំជម្រះ​សាលាដំបូង ចុះថ្ងៃទី២៦ ខែកក្កដា ឆ្នាំ២០១០ ហើយ​មតិ​ភាគច្រើន​លើសលប់​របស់​អង្គជំនុំជម្រះ​តុលាការ​កំពូល​ក៏បាន​បដិសេធ​ចោល​សេចកី្ត​សម្រេច​របស់​អង្គជំនុំជម្រះ​សាលាដំបូង​ក្នុងការ​សងសំណង​ចំពោះ​ការរំលោភ​លើ​សិទិ្ធ​របស់ កាំង ហ្កេកអ៊ាវ ដោយសារ​ការ​ឃុំខ្លួន​ខុសនីតិវិធីច្បាប់​ដោយ​តុលាការ​យោធា​កម្ពុជា​ចាប់តាំង​ពីថ្ងៃទី១០ ខែឧសភា ឆ្នាំ១៩៩៩ រហូតដល់ថ្ងៃទី៣០ ខែកក្កដា ឆ្នាំ២០០៧។ អង្គជំនុំជម្រះ​តុលាការកំពូល​បាន​​បដិសេធ​ចោល​បណ្តឹងសាទុក្ខ​របស់ កាំង ហ្កេកអ៊ាវ ដែល​បាន​លើកឡើងថា ខ្លួន​មិន​សិ្ថត​នៅ​ក្នុង​យុត្តាធិការ​លើ​រូបបុគ្គល​របស់​តុលាការទេ។ អង្គជំនុំជម្រះ​តុលាការ​កំពូល​សម្រេចថា ចំពោះ​បញ្ហា​ថាតើ​ជនជាប់ចោទ​គឺជា​មេដឹកនាំ​ជាន់ខ្ពស់​មួយរូប ឬជា​ជនមួយរូប​ក្នុង​ចំណោម​ជនទាំងឡាយ​ដែល​ទទួល​ខុសត្រូវ​ខ្ពស់បំផុត ដែរ​ឬ​យ៉ាងណា​នោះ គឺជា​សេចក្តី​សម្រេច​ផ្តាច់មុខ​ផ្នែកគោលការណ៍​ណែនាំ​របស់​សហចៅក្រម​ស៊ើបអង្កេតនិង​សហ​ព្រះរាជអាជ្ញា​ដែល​ជាអ្នក​ទទួល​ខុសត្រូវ។

អង្គជំនុំជម្រះ​តុលាការ​កំពូល​សម្រេច​ថា អង្គជំនុំជម្រះ​សាលា​ដំបូង​បាន​ផ្តល់​ទម្ងន់​មិនសម​ហេតុផល​ចំពោះ​ស្ថានសម្រាលទោស និង​មិនបាន​ផ្តល់ទម្ងន់​ឲ្យ​បាន​គ្រប់គ្រាន់​ចំពោះ​ស្ថានទម្ងន់​នៃឧក្រិដ្ឋកម្ម និង​ស្ថានទម្ងន់ទោស នៅក្នុង​ការ​សម្រេច​ផ្តន្ទាទោស​នោះទេ។ ពាក់ព័ន្ធ​នឹង​កត្តា​ស្ថានទម្ងន់ទោស អង្គជំនុំជម្រះ​តុលាការ​កំពូល​កត់សម្គាល់​ឃើញថា ជនជាប់ចោទ​មាន​តួនាទី​ជា​មេដឹកនាំ​ធំជាងគេ​នៅ​មន្ទីរ ស២១ ហើយ​ជនជាប់ចោទ​បាន​បំពាន​តួនាទី​របស់ខ្លួន ដោយ​បាន​បង្ហាត់​បង្រៀន បញ្ជា និងគ្រប់គ្រង ទៅលើ​បុគ្គលិក​ក្នុងការ​ធើ្វ​ទារុណកម្ម​ជាប្រព័ន្ធ និងការ​សម្លាប់​អ្នកទោស​ដែល​ត្រូវបាន​ចាត់ទុក​ថាជា​សត្រូវ​របស់​របប​កម្ពុជា​ប្រជាធិបតេយ្យ តាមរយៈ​ការបង្ហាញ "ការ​ខិតខំ​ប្រឹងប្រែង​បំពេញ​ភារកិច្ច​ដើម្បី​ធើ្វឲ្យ​មន្ទីរ ស២១ ដំណើរការ​ទៅ​បាន​យ៉ាង​រលូន" ដែលជា "ទីកន្លែង​សម្លាប់​មនុស្សដ៏ធំ​ដោយ​មានការ​រៀបចំ"។

អង្គជំនុំជម្រះ​បាន​កត់សម្គាល់ថា ចំនួន​មនុស្ស​ស្លាប់​ដ៏ច្រើន​ដែល កាំង ហ្កេកអ៊ាវ ជាអ្នក​ទទួលខុសត្រូវ​នោះ (ជាអប្បបរមា ១២.២៧២ នាក់) ព្រមទាំង​រយៈពេល​ដ៏វែង​នៃ​បទឧក្រិដ្ឋ​ដែលបាន​ប្រព្រឹត្ត  (ជាងបីឆ្នាំ) គឺពិតជា​ធ្វើឲ្យ​សំណុំរឿង​នេះ​ជា​សំណុំរឿងមួយ​ដែល​មាន​លក្ខណៈ​ធ្ងន់ធ្ងរ​ជាងគេ​បំផុត​នៅ​តុលាការ​ឧក្រិដ្ឋកម្ម​អន្តរជាតិ។ អង្គជំនុំជម្រះ​ក៏បាន​យល់ឃើញ​ផងដែរ​ថា ការពិត​ដែលថា​ជនជាប់ចោទ​មិនមែនជា​ជនកំពូល​នៃ​ខ្សែបណ្តាញ​បញ្ជា​នៅក្នុង​របប​កម្ពុជា​ប្រជាធិបតេយ្យ មិនអាច​ធ្វើជា​យុត្តិកម្ម​ក្នុងការ​កាត់បន្ថយទោស​នោះបានទេ ហើយថា មិនមាន​វិធាន​ណាមួយ​ដែលចែង​អំពី​កម្រិត​នៃ​ការ​ផ្តន្ទាទោស​ខ្ពស់​បំផុត​ចំពោះ​ចារី​ដែល​ត្រូវបាន​ចាត់ទុក​ជា​ជនកំពូល​នៃ​ខ្សែបណ្តាញ​បញ្ជា​នោះទេ។

សំឡេង​ភាគច្រើន​លើសលប់ (ជំទាស់ដោយចៅក្រម Klonowiecka-Milart និងចៅក្រម Jayasinghe) យល់ឃើញ​ទៀតថា អង្គជំនុំជម្រះ​សាលាដំបូង​មានកំហុស​ក្នុងការ​បកស្រាយ​យុត្តិសាស្ត្រ​ពាក់ព័ន្ធ​របស់​តុលាការ​អន្តរជាតិ ឲ្យមាន​ខ្លឹមសារ​ថា ការ​រំលោភបំពាន​ទៅលើ​សិទ្ធិ​របស់​ជនជាប់ចោទ​គប្បី​ត្រូវ​ទទួលបាន​ការទូទាត់​ពី អ.វ.ត.ក ទោះបីជា​មិនមែន​ជាការ​រំលោភបំពាន​របស់ អ.វ.ត.ក និង​ទោះបី​ជា​មិនមាន​ការរំលោភ​លើ​កិច្ចដំណើរការ​នីតិវិធី​ក៏ដោយ។ អង្គជំនុំជម្រះ​សាលាដំបូង​គួរតែ​បាន​បដិសេធ​សំណ​សុំ​សំណង​របស់​ជនជាប់ចោទ​រួចទៅហើយ ដោយសារតែ​ការ​ពុំ​មាន​ស្ថានភាព​ទាំងពីរ​នេះ។

ចៅក្រម Klonowiecka-Milart និងចៅក្រម Jayasinghe យល់ឃើញថា ការ​ផ្តល់សំណង​គឺជា​ការ​ទទួលខុសត្រូវ​របស់ អ.វ.ត.ក  ហើយថា ការផ្តល់ឲ្យ កាំង ហ្កេកអ៊ាវ នូវសំណង​ដោយ​ការ​កាត់បន្ថយទោស​ពី​ការ​ដាក់​ពន្ធនាគារ​អស់មួយជីវិត​មកនៅ​ត្រឹម​ការ​ដាក់​ពន្ធនាគារ​មាន​កំណត់​រយៈពេល​ត្រឹម ៣០ឆ្នាំ គឺជាការ​សមស្រប។

អង្គជំនុំជម្រះ​តុលាការ​កំពូល​ក៏បាន​យល់ព្រម​តាម​បណ្តឹងសាទុក្ខ​របស់​សហ​ព្រះរាជអាជ្ញា​មួយផ្នែក ដែលបាន​ស្នើសុំឲ្យ​សម្រេច​អំពី​ពិរុទ្ធភាព​ពី​បទល្មើស​ច្រើន​អំពី​បទឧក្រិដ្ឋកម្ម​ប្រឆាំង​មនុស្សជាតិ។ នៅក្នុង​សំអាងហេតុ​របស់ខ្លួន អង្គជំនុំជម្រះ​តុលាការ​កំពូល​បាន​លើក​ឡើងថា អង្គជំនុំជម្រះ​សាលា​ដំបូង​មាន​កំហុស​លើ​អង្គច្បាប់ ដោយ​បាន​ដាក់​បញ្ចូល​នូវ​ឧក្រិដ្ឋកម្ម​ប្រឆាំង​មនុស្សជាតិ​ជាក់លាក់​ទៅក្នុង​ឧក្រិដ្ឋកម្ម​នៃការ​ធ្វើទុក្ខ​បុកម្នេញ ជំនួស​ឲ្យ​ការ​សម្រេច​អំពី​ពិរុទ្ធភាព​របស់ កាំង ហ្កេកអ៊ាវ ពីបទឧក្រិដ្ឋកម្ម​ប្រឆាំង​មនុស្សជាតិ​ទាំងអស់​ដែល​តុលាការ​បាន​រកឃើញថាគាត់​ជាអ្នក​ទទួល​ខុសត្រូវ។ អាស្រ័យហេតុនេះ អង្គជំនុំជម្រះ​តុលាការ​កំពូល​សម្រេច​តម្កល់​ការសម្រេច​​អំពី​​ពិរុទ្ធភាព ពី​បទឧក្រិដ្ឋកម្ម​ប្រឆាំង​មនុស្សជាតិ​នៃ​ការ​ធ្វើទុក្ខ​បុកម្នេញ និងបាន​បញ្ចូលការ​សម្រេច​អំពី​ពិរុទ្ធភាព​បន្ថែមទៀត​ពី​បទឧក្រិដ្ឋកម្ម​ប្រឆាំង​មនុស្សជាតិ​នៃ​ការ​សម្លាប់រង្គាល (រួមបញ្ចូល​ទាំង​ការ​ធ្វើ​មនុស្សឃាត) ការធ្វើ​ឲ្យទៅជា​ទាសករ ការ​ដាក់​ក្នុង​មន្ទីរ​ឃុំឃាំង ការ​ធ្វើ​ទារុណកម្ម ព្រមទាំង​អំពើ​អមនុស្សធម៌​ផ្សេងទៀត។

អង្គជំនុំជម្រះតុលាការ​កំពូល​ក៏បាន​យល់ព្រម​តាម​បណ្តឹង​សាទុក្ខ ដែល​ធ្វើឡើង​ដោយ​អ្នក​ដាក់​ពាក្យបណ្តឹង​សុំតាំង​ខ្លួន​ជាដើមបណ្តឹងរដ្ឋប្បវេណី​ចំនួន ១០ នាក់ ដែល​ពាក្យសុំ​របស់​ពួកគាត់​ត្រូវបាន​អង្គជំនុំជម្រះ​សាលា​ដំបូង​បដិសេធ​ចោល​នៅក្នុងសា​​លក្រម។ ម្ចាស់បណ្តឹង​សាទុក្ខ​ជាដើមបណ្តឹងរដ្ឋប្បវេណី​ទាំងអស់នេះ​បាន​បង្ហាញ​ភស្តុតាង​បន្ថែម​នៅក្នុង​ពាក្យសុំ​របស់ខ្លួន​នៅ​ពេលប្តឹង​សាទុក្ខ ហេតុដូច្នេះហើយ​ពួកគាត់​ត្រូវបាន​ទទួលស្គាល់​ថាជា​ដើមបណ្តឹង​រដ្ឋប្បវេណី​នៅក្នុង​សំណុំរឿង ០០១។

អង្គជំនុំជម្រះ​តុលាការ​កំពូល​ក៏បាន​ធ្វើសេចក្តី​សម្រេច​លើ​បណ្តឹង​សាទុក្ខ ដែល​ធ្វើឡើង​ដោយ​ដើមបណ្តឹង​រដ្ឋប្បវេណី​ទាំងឡាយ​ពាក់ព័ន្ធ​នឹង​សេចក្តី​សម្រេច​របស់​អង្គជំនុំជម្រះ​សាលាដំបូង លើសំណើ​របស់​ពួកគាត់​សុំសំណង​សមូហភាព​និង​សំណង​ផ្លូវចិត្ត​ផងដែរ។ អង្គជំនុំជម្រះ​តុលាការ​កំពូល​សម្រេច​តម្កល់​សេចក្តី​សម្រេច​របស់​អង្គជំនុំជម្រះ​សាលាដំបូង​ដែល​សម្រេច​ចងក្រង និង​ចុះផ្សាយ​នៅលើ​គេហទំព័រ​ផ្លូវការ​របស់ អ.វ.ត.ក នូវរាល់​សេចក្តី​ថ្លែង​សុំ​អភ័យទោស និង​ការ​ទទួលស្គាល់​ការ​ទទួលខុសត្រូវ​ដែល​បាន​ធ្វើឡើង​ដោយ កាំង ហ្កេកអ៊ាវ នៅក្នុង​អំឡុងពេល​ដំណើរការ​សវនាការ រួមទាំង​នៅ​ដំណាក់កាល​ប្តឹងសាទុក្ខ​ផងដែរ។ រាល់សំណើសុំ​ទាមទារ​សំណង​របស់​ដើមបណ្តឹង​រដ្ឋប្បវេណី​ផ្សេងទៀត​ទាំងអស់ ត្រូវបាន​អង្គជំនុំជម្រះ​តុលាការ​កំពូល​សម្រេច​បដិសេធ​ចោល ដោយសារតែ​សំណើសុំ​ទាមទារ​ទាំងនោះ​នឹង​មិនអាច​បង្ខំ​ឲ្យ​អនុវត្ត​បាន ឬ ដើម្បី​អនុវត្ត​សំណើសុំ​ទាមទារ​ទាំងនោះ​បាន ពួកគាត់​នឹង​ត្រូវការ​ជា​ចាំបាច់នូវ​ធនធាន​ហិរញ្ញវត្ថុ​របស់ កាំង ហ្កេកអ៊ាវ ដែល​ជា​ជនក្រីក្រ ឬតម្រូវឲ្យ​មានការ​បង្គាប់​ទៅ​រដ្ឋកម្ពុជា។

សេចក្តី​សង្ខេប​នៃ​សាលដីកា​លើ​បណ្តឹង​សាទុក្ខ ដែល​ត្រូវបាន​ប្រកាស​នៅក្នុង​សវនាការ​ជាសាធារណៈ​នាថ្ងៃនេះ មាន​នៅលើ​គេហទំព័រ​ជាផ្លូវការ​របស់​តុលាការ (www.eccc.gov.kh)។ សាលដីកា​លើ​បណ្តឹងសាទុក្ខ​ទាំងមូល​នឹង​ត្រូវបាន​ផ្សព្វផ្សាយ​នៅពេល​សមស្រប​ខាង​មុខ។

សូមចុចទីនេះដើម្បីអានសាលដីកាសង្ខេប

 
នរណាខ្លះនៅក្នុងបន្ទប់សវនាការ

who-is-who
ដើម្បី​ជា​ជំនួយ​ដល់អ្នក​សារព័ត៌មាន​និងសាធារណជន​ទូទៅ​ដែលតាមដាន​ការផ្សាយវីដេអូ​បន្តផ្ទាល់​អំពីសវនាការ​របស់ អ.វ.ត.ក យើងបានបង្កើត​ទំព័រមួយ​ដែលមានឈ្មោះថា នរណាខ្លះ​នៅក្នុង​បន្ទប់សវនាការ ដែលរកអ្នកអាចឃើញនៅ http://www.eccc.gov.kh/kh/who-is-who។​ នៅលើ​ទំព័រ​នេះ សាធារណជន​នឹង​ឃើញ​រូបថត​និងប្រវត្តិរូបសង្ខេប​របស់​ចៅក្រមនិងភាគី​ទាំងឡាយដែល​មានវត្តមាន​នៅក្នុង​បន្ទប់​សវនាការ។

 
របាយការណ៍តុលាការ

The special edition of the "The Court Report" covers the final judgement in Case 001, concerning the convicted person Kaing Guek Eav alias Duch.

Read the latest issue:
http://www.eccc.gov.kh/sites/default/files/articles/Case%20001%20Final%20Judgement%20Court%20Report_0.pdf

 
សេចក្តី​ប្រកាស​ព័ត៌មាន​របស់​សហចៅក្រម​ស៊ើបអង្កេតជាតិ

នាថ្ងៃម្សិល​មិញនេះ ​សហចៅក្រម​ស៊ើបអង្កេត​បម្រុងអន្តរជាតិ​ Laurent Kasper Ansermet​ បានធ្វើនូវ​សេចក្តី​ប្រកាស​ព័ត៌មាន​ មួយយ៉ាង​ប្រញាប់ប្រញាល់​បំផុត ​នៅចុងម៉ោង​ធ្វើការរបស់ ​អ.វ.ត.ក ​ដែលសហចៅក្រម​ស៊ើបអង្កេត​ជាតិយល់ឃើញថា​ ៖

១. ការលួចចេញ​នូវសេចក្តីប្រកាស​ព័ត៌មាន​នៅពីក្រោយខ្នង​​សហចៅក្រមស៊ើបអង្កេតជាតិ​ម្តងហើយ​ម្តងទៀត​គឺ​ជាការបង្ហាញ​នូវចេតនា​មិនល្អរបស់​​លោក Laurent Kasper-Ansermet ។

២. ខ្លឹមសារ​នៃសេចក្តីថ្លែងការណ៍​​របស់លោក ​Kasper-Ansermet​ បង្ហាញយ៉ាងច្បាស់​​ក្រឡែត​នូវចេតនាបំភ័ន្ត​មតិសាធារណៈ​ ជាពិសេស​ចំណុច​ ដែលថា​​ «សហចៅក្រម​ស៊ើបអង្កេតជាតិ​ជំទាស់ទៅនឹង​សំណើ​បំពេញកិច្ចស៊ើបសួរ​ដែលបានស្នើឡើង​ដោយលោក​ (Kasper-Ansermet)»​។ សហចៅក្រម​​ស៊ើបអង្កេត​ជាតិ ​សូមបញ្ជាក់​ជាថ្មីថា ​សហចៅក្រមជាតិ​មិនដែលបាន​ពិភាក្សា​លើ​បញ្ហាកិច្ច​នីតិវិធីណា​​មួយជាមួយ​លោកចៅក្រម​ Laurent Kasper-​Ansermet​ ឡើយ ហើយរឹតតែ​មិនដែលធ្លាប់​បានខ្វែង​យោបល់អំពីចំណាត់​ការនីតិវិធី​ណា​​មួយជាមួយ​គាត់ដែរ​។ នាពេលកន្លងមក សហ​ចៅក្រមស៊ើប​អង្កេតជាតិ​តែងតែគោរព​​ជានិច្ចនូវ​ជំហរ​ឯករាជ្យ​របស់សហចៅក្រម​ស៊ើបអង្កេត​អន្តរជាតិ​ ហើយជាពិសេស​ កិច្ចព្រមព្រៀង​ ច្បាប់អ.វ.ត.ក​ និងវិធានផ្ទៃក្នុង​ មានចែង​យ៉ាងច្បាស់​អំពីយន្តការ​ក្នុងការដោះស្រាយ​នូវការខ្វែងយោបល់គ្នា​របស់សហចៅក្រម​ទាំងពីរដើម្បី​ធានាបាន​នូវដំណោះ​​ស្រាយបញ្ហាមួយ​ស្រប​តាម​​គោលការណ៍​​ជំនុំជម្រះក្តី​ប្រកបដោយ​យុត្តិធម៌។​ ជាក់ស្តែង​ យន្តការនេះ​ត្រូវបាន​អនុវត្ត​ និងគោរពតាម​ នៅក្នុងការដោះស្រាយ​ការខ្វែងយោបល់​​គ្នា​ដែល​ធ្លាប់មាន​កន្លងមក​រវាងសហចៅក្រមស៊ើប​អង្កេតជាតិ ​និង​សហចៅក្រម​ស៊ើបអង្កេតអន្តរជាតិ​ Marcel Lemonde ​និងសហចៅក្រម​ Siegfried Blunk នៅក្នុង​ក្របខ័ណ្ឌ​នៃសំណុំរឿង​ស៊ើបសួរ​ដែលមាន​នៅ ​អ.វ.ត.ក​។

៣. ការលើកឡើង​អំពីមាត្រា​នៃកិច្ចព្រមព្រៀង​ និងមាត្រា​នៃច្បាប់ស្តីពីការ​បង្កើត​អ.វ.ត.ក​ គ្រាន់តែជា​ការបំផ្លើស​របស់ចៅក្រម​ Laurent Kasper-Ansermet ប៉ុណ្ណោះ​ ដោយហេតុថា​ មិនមានមាត្រា​ណាមួយនៅ​ក្នុងចំណោម​មាត្រាទាំងនោះ​ អនុញ្ញាតឲ្យលោក​ Kasper-Ansermet​ មានសិទ្ធិធ្វើ​ចំណាត់ការណា
មួយ​​ក្នុងនាមជា​​សហចៅក្រម​ស៊ើប​អង្កេត​បម្រុងនៅក្នុងករណី​កន្លែង​សហចៅក្រមស៊ើប​អង្កេតអន្តរជាតិ​នៅទំនេរឡើយ​ ផ្ទុយទៅ​វិញមាត្រា ៥.៦ នៃកិច្ច
ព្រម​ព្រៀងតម្រូវ​ឲ្យមានការតែងតាំង​សហចៅក្រម​ស៊ើបអង្កេត​បម្រុង​ជា​សហចៅក្រម​ពេញសិទ្ធិសិន។ នេះគឺស្របតាម​ការអនុវត្ត​កន្លងមក​ចំពោះករណី​​សហចៅក្រម​ស៊ើបអង្កេត​អន្តរជាតិ​មុនៗ។

៤. សកម្មភាព​របស់លោក​ Laurent Kasper-Ansermet ​បង្ហាញអំពីកង្វះខាត​ផ្នែកការយល់ដឹង​ ឬ​ការគោរព​ចំពោះវិធានផ្ទៃក្នុង​ និង​គោលការណ៍​ច្បាប់​ ដែល​​អនុវត្តនៅ ​អ.វ.ត.ក.​  ដែលនាំឲ្យ​សហ​ចៅក្រមជាតិ​ឆ្ងល់ថា​ ភាពចចេសរឹងរូស​ និងការបង្កឲ្យ​បាត់បង់នូវ​ការ​អនុវត្តច្បាប់​ និងវិធានផ្ទៃ​ក្នុងនៅ​ អ.វ.ត.ក ​របស់លោក​ចៅក្រម​បម្រុង​រូបនេះ​ធ្វើឡើង​ដើម្បីអ្វី?​ ជាក់ស្តែង​ ដោយមិនគិត​ដល់កង្វះ​លក្ខណៈ​សម្បត្តិ​តាមផ្លូវច្បាប់​របស់​លោក​ Kasper-Ansermet ការចេញនូវ​សេចក្តីប្រកាស​ព័ត៌មាន​ទាក់ទង​ទៅនឹង​​ចំណាត់ការ​នីតិវិធីដែលខ្លួន​បានធ្វើដោយ​យោងទៅវិធាន​ ២១.១ (គ) គឺមិនត្រឹមត្រូវ​ឡើយ​ ខណៈ​វិធាននេះ​មិនមែន​ជាវិធាន​ដែលត្រូវ​អនុវត្ត​ដើម្បីចេញនូវ​សេចក្តីប្រកាស​ព័ត៌មាន​ទាក់ទង​នឹងសំណុំរឿង​ស៊ើបសួរឡើយ។

៥. ការចេញនូវសេចក្តី​ប្រកាស​ព័ត៌មាន​របស់លោក​ Kasper-Ansermet នេះ​កាន់តែនាំ​ឲ្យសហ ចៅក្រម​ស៊ើបអង្កេតជាតិ​មានមន្ទិល​​កាន់តែខ្លាំង​ឡើង​អំពី​វិជា្ជជីវៈ​របស់​លោកចៅក្រម​ Kasper-Ansermet ថា​តើ​គាត់​មាន​វិជ្ជាជីវៈ​ជាចៅក្រម​ ឬ ​ជាអ្នកផ្សព្វផ្សាយ​សារព័ត៌មាន?​

 
សេចក្តី​ប្រកាស​ព័ត៌មាន​របស់​សហ​ចៅក្រម​ស៊ើបអង្កេត​អន្តរជាតិ​បម្រុង

សេចក្តី​ប្រកាស​ព័ត៌មាន​ជា​សាធារណៈ​នេះ​ត្រូវបាន​ធ្វើ​ឡើង​​ដោយ​អនុលោម​តាម​វិធាន​ផ្ទៃក្នុង ២១(១)(គ) របស់  អ.វ.ត.ក ដើម្បី​ធានា​ថា​សាធារណជន ជាពិសេស ជនរងគ្រោះ​នៃ​ឧក្រិដ្ឋកម្ម​ដែល​កំពុង​ស្ថិត​នៅ​ក្រោម​ការ​ស៊ើបអង្កេត​ត្រូវបាន​​ទទួល​ព័ត៌មាន​ក្នុង​ថិរវេលា​សមស្រប អំពី​ដំណើរការ​នីតិវិធី​ដែល​​កំពុង​បន្ត​របស់ អ.វ.ត.ក។

សហ​ចៅក្រម​ស៊ើបអង្កេត​អន្តរជាតិ​បម្រុង​បាន​ស្បថ​ចូល​កាន់តំណែង​​ជា​សហចៅក្រម​ស៊ើបអង្កេត​បម្រុង នៅ​ចំពោះ​មុខ​កិច្ចប្រជុំ​ពេញ​អង្គ​នៃ អ.វ.ត.ក កាលពី​ថ្ងៃទី ២១ ខែ កុម្ភៈ ឆ្នាំ ២០១១។ ដោយ​អនុលោម​តាម​កិច្ច​ព្រមព្រៀង​​ដែល​ត្រូវបាន​ចុះហត្ថលេខា​ដោយ​រាជរដ្ឋាភិបាល​កម្ពុជានិង​អង្គការ​សហ​ប្រជាជាតិ និង​ច្បាប់​គ្រប់គ្រង​ដំណើរការ​​នីតិវិធី​នៅ​ចំពោះ​មុខ អ.វ.ត.ក សហ​ចៅក្រម​ស៊ើប​អង្កេត​អន្តរជាតិ​បម្រុង​មាន​កាតព្វកិច្ច​ផ្លូវច្បាប់​ក្នុងការ​​ស៊ើបអង្កេត​សំណុំរឿង​​ដែល​ត្រូវបាន​បញ្ជូន​មក​ពី​ការិយាល័យ​សហ​ព្រះរាជអាជ្ញា [មាត្រា ៥(៦) នៃ​កិច្ចព្រមព្រៀង​ស្តីពី​ការ​បង្កើត អ.វ.ត.ក និងមាត្រា ១២ ២៣ ២៦ ២៧ និង​មាត្រា​ផ្សេងទៀត​នៃ​ច្បាប់​ស្តីពី​ការបង្កើត អ.វ.ត.ក]។ ដូច្នេះ សហ​ចៅក្រម​ស៊ើបអង្កេត​អន្តរជាតិ​បម្រុង មាន​សិទ្ធិ​ស្របច្បាប់​ពេញ​លេញ​ក្នុងការ​បំពេញ​មុខងារ​​របស់ខ្លួន ទោះបីជា​ឧត្តម​ក្រុមប្រឹក្សា​នៃ​អង្គចៅក្រម​បាន​បដិសេធ​មិន​ធ្វើការ​តែងតាំង​រូបលោក​ជា​​សហ​ចៅក្រម​ស៊ើប​អង្កេត​ពេញសិទ្ធិ​ក៏ដោយ។ ចាប់តាំង​ពីបាន​ចូលរួម​ជាមួយ អ.វ.ត.ក នៅថ្ងៃទី ១ ខែ ធ្នូ ឆ្នាំ ២០១១ លោក​បាន​​ចាត់​វិធាន​ផ្សេងៗ​ដើម្បី​ធានា​ឲ្យ​មាន​ដំណើរការ​ប្រកប​ដោយ​​ប្រសិទ្ធភាព​នៅ​ផ្នែកអន្តរជាតិ​នៃ​ការិយាល័យ​សហ​​ចៅក្រម​ស៊ើបអង្កេត រួមមាន ការ​ដាក់​សំណើ​ជាថ្មី​ដល់​អង្គការ​សហប្រជាជាតិ សុំបុគ្គលិក​ចាំបាច់​បន្ថែម​ទៀត ដើម្បី​ឲ្យ​មាន​លទ្ធភាព​​ស៊ើបអង្កេត​ប្រកប​ដោយ​ប្រសិទ្ធភាព​នៅក្នុង​សំណុំរឿង ០០៣ និង ០០៤។

កាលពី​ថ្ងៃទី ១៥ ខែ ធ្នូ ឆ្នាំ ២០១១ និង ថ្ងៃទី ៣ ខែ កុម្ភៈ ឆ្នាំ ២០១២   សហ​ចៅក្រម​ស៊ើបអង្កេត​អន្តរជាតិ​បម្រុង​​បាន​ដាក់​កំណត់ហេតុ​ចំនួន​ពីរ​ស្តីពី​ការ​ខ្វែង​យោបល់​ទាក់ទិន​នឹង​កិច្ចស៊ើបសួរ​នៅ​ក្នុង​សំណុំរឿង ០០៣ និង ០០៤ ជូន​អង្គបុរេ​ជំនុំជម្រះ (វិធានផ្ទៃក្នុង ៧២)។ នៅក្នុង​កំណត់ហេតុ​ទាំងពីរ សហចៅក្រម​ស៊ើបអង្កេត​ជាតិ​បាន​លើកឡើង​ជាដំបូង​យ៉ាងច្បាស់ ហើយ​ក្រោយមក​​ដោយ​ប្រយោល អំពី​ការជំទាស់​របស់ខ្លួន​ចំពោះ​សំណើ​សុំ​ឲ្យ​មាន​កិច្ច​ស៊ើបសួរ​ទាំងនេះ។ មូលដ្ឋាន​នៃ​ការ​ជំទាស់នេះ​គឺថា ឧត្តម​ក្រុមប្រឹក្សា​នៃ​អង្គចៅក្រម​មិនទាន់​បាន​តែងតាំង​សហ​ចៅក្រម​ស៊ើបអង្កេត​អន្តរជាតិ​បម្រុង​ជា​​សហ​ចៅក្រម​ស៊ើបអង្កេត​ពេញសិទ្ធិ​នៅឡើយ ដូច្នេះ​គាត់​គ្មាន​សិទ្ធិ​ចាត់វិធានការ​ទេ។

ប្រធាន​អង្គ​បុរេ​ជំ​នុំជម្រះ​បាន​ទទួល​ការ​ខ្វែង​​យោបល់​ទាំងនេះ​ក្នុង​ថិរវេលា​ទាន់ពេល​និង​សមស្រប ហើយ​តាម​រយៈ​អនុស្សរណៈ​​ចុះថ្ងៃទី ៣ ខែ កុម្ភៈ ឆ្នាំ ២០១២ បាន​បញ្ជូន​កំណត់ហេតុ​នៃ​ការ​ខ្វែង​យោបល់​ទាំងពីរនេះ​ត្រឡប់វិញ ដោយ​​មិនបាន​ជូន​ដំណឹង​ថា អង្គបុរេ​ជំនុំជម្រះ​បាន​ធ្វើ​សេចក្តី​សម្រេច​មួយ​ដោយ​មាន​សម្អាងហេតុ​ឡើយ។ អនុស្សរណៈ​នេះ​បាន​បញ្ជាក់​ថា "ចៅក្រម​នៃ​អង្គបុរេ​ជំនុំជម្រះ" បាន​ជួបប្រជុំ​នៅថ្ងៃ​ទី ២៧ ខែ មករា ឆ្នាំ ២០១២ ហើយ ចៅក្រម​នៃ​អង្គបុរេ​ជំនុំជម្រះ​មិនបាន "ឯកភាព​គ្នា​ដើម្បី​ធ្វើការ​ពិចារណា​ទៅលើ​ខ្លឹមសារ​នៃ​ឯកសារ​ទាំងនេះ​ទេ" ដោយ​ផ្អែកលើ​មូលដ្ឋានថា "លោក Laurent Kasper-Ansermet មិនមាន​លក្ខណៈ​សម្បត្តិ​ចាំបាច់​ដើម្បី​បំពេញ​តួនាទី​របស់ខ្លួន ដោយ​អនុលោម​តាម​កិច្ច​ដំណើរការ​នីតិវិធី​ស្របច្បាប់​ជា​ធរមាន​ឡើយ"។

ដោយ​អនុលោម​តាម​ច្បាប់​សម្រាប់​ដោះស្រាយ​​ការ​ខ្វែង​យោបល់គ្នា [មាត្រា ២៣ ថ្មី នៃ​ច្បាប់​ស្តីពី​ការបង្កើត អ.វ.ត.ក និងវិធានផ្ទៃក្នុង ៧២ (៤)(ឃ) ប្រសិនបើ​​អ​ង្គបុរេ​ជំនុំជម្រះ​មិនអាច​រក​បាន​នូវ​សម្លេង​គាំ​ទ្រ​ភាគច្រើន​តាម​ការ​តម្រូវ  ដីកា ឬ​កិច្ចស៊ើបសួរ​ដែល​បាន​ធ្វើឡើង (ឬ​ដែល​បម្រុង​នឹង​ធ្វើ) ត្រូវមាន​សុពលភាព (ឬ​ត្រូវតែ​យកមក​អនុវត្ត)។ គោលការណ៍​នេះ​ត្រូវ​យកមក​អនុវត្ត​យ៉ាង​​ពេញលេញ​ចំពោះ​ការ​ខ្វែង​យោបល់​ស្តីពី​កិច្ចស៊ើបសួរ ដែល​ត្រូវបាន​ស្នើសុំ​ដោយ​សហ​ចៅក្រម​ស៊ើបអង្កេត​អន្តរជាតិ។ ដូច្នេះ សេចក្តី​សម្រេច​ទាំងពីរ​អាច​យកមក​អនុវត្ត​បាន។

ដោយ​ផ្អែក​លើ​មូលដ្នាន​នេះ នៅថ្ងៃនេះ សហ​ចៅក្រម​ស៊ើបអង្កេត​អន្តរជាតិ​បាន​​ចេញ​​ដីកា​ស្តីពី​ការ​ប​ន្ត​ធ្វើ​ឡើងវិញ​នូវ​ការ​ស៊ើបអង្កេត​នៅក្នុង​សំណុំរឿង ០០៣ (ចំណាត់ថ្នាក់ឯកសារ៖ សាធារណៈ)។

ច្បាប់​តម្រូវ​ឲ្យ​អង្គបុរេ​ជំនុំជម្រះ​ធ្វើការ​ពិនិត្យ​លើ​កម្មវត្ថុ​នៃ​ការ​​ខ្វែងយោបល់ និង​ចេញ​សេចក្តី​សម្រេច "ដោយ​មាន​សម្អាង​ហេតុ និង​ដោយ​មាន​ចុះ​ហត្ថលេខា​របស់​អ្នក​ចេញ​សេចក្តី​សម្រេច" [វិធានផ្ទៃក្នុង ៧២(៤)(ង)]។ ប្រធាន​អង្គបុរេ​ជំនុំជម្រះ​មិនបាន​ឲ្យ​មាន​ការ​ជូនដំណឹង​អំពី​សេចក្តី​សម្រេច​នេះ​តាម​តម្រូវការ​នៃ​ច្បាប់​ដែល​ចែង​ពី​នីតិវិធី​ទាំងនេះ​ឡើយ។ ស្ថានភាព​នេះ​បង្ក​ឲ្យ​មាន​សេចក្តី​ព្រួយបារម្ភ​យ៉ាង​ធ្ងន់ធ្ងរ​អំពី​កង្វះ​នៃ​ភាព​អនាគតិ​របស់​លោក ប្រាក់ គឹម សាន ប្រធាន​អង្គបុរេ​ជំនុំជម្រះ។ ដោយ​ផ្អែក​លើ​មូលដ្នាន​ទាំងនេះ សំណើសុំ​ដាក់​បណ្តឹង​ដិតចិត្ត​ចំពោះ​ចៅក្រម ប្រាក់ គឹមសាន ត្រូវបាន​ដាក់​ជូន​អង្គបុរេជំនុំជម្រះ ដោយ​ស្នើសុំ​ឲ្យ​ចៅក្រម ប្រាក់ គឹមសាន លាលែង​ដោយ​ស្ម័គ្រចិត្ត​ពី​ដំណើរការ​នីតិវិធី​ទាំងឡាយ​ទាក់ទិន​នឹង​សំណុំ​រឿង ០០៣ និង ០០៤។

ដើម្បី​កែតម្រូវ​កំហុស​នីតិវិធី​ដែល​នាំ​ឲ្យ​សហ​ចៅក្រម​ស៊ើបអង្កេត​អន្តរជាតិ​មិនបាន​ទទួល​ដំណឹង​ស្តីពី​សេចក្តី​សម្រេច​លើ​ការ​​ខ្វែង​យោបល់​ទាំងនេះ កំណត់ហេតុ​នៃ​ការ​ខ្វែងយោបល់​ត្រូវបាន​បញ្ជូន​ត្រឡប់​ទៅ​អង្គបុរេជំនុំជម្រះ​វិញ។

 
<< ចាប់ផ្ដើម < មុន 1 2 3 4 5 6 បន្ទាប់ > ចុងក្រោយ >>

ទំព័រ​ទី 2 ​ទាំងអស់ 6 ទំព័រ
Victims Support Section of the ECCC